Скрыбыкина Елизавета Ивановна Горнай оройуонун Одуну нэһилиэгэр Маҕарас бөһүөлэгиттэн чугас сытар Буор Дьиэ диэн сиргэ, 1928 с. дьадаҥы ыалга күн сирин көрбүт. Аҕата Иван Николаевич Скрыбыкин Маҕарас төрүт олохтооҕо, оттон ийэтэ Мытаах сириттэн төрүттээх Агафья Николаевна Скрыбыкина.
Елизавета 1937 с. Буор Дьиэҕэ олоро сылдьан, маҥнайгы кылааска үөрэнэ киирбит. Халыҥ таҥаһа-саба суох, үчүгэйдик тото-хана аһаабат кыра кыысчаан, тымныыга ыраахтан сылдьан үөрэнэрэ эттэххэ дөбөҥ. Ол да буоллар, маҥнайгы кылааһын үөрэнэн бүтэрэр. Иккис кылааска үөрэнэригэр дьоно Маҕараска көһөн кэлэллэр. Ити кэмтэн ыла, харыс сири халбарыйбакка Маҕараска олохсуйар.
1941 с. дурдалара-хаххалара, иитэр-аһатар аҕалара холкуоска үлэлии сылдьан, ыалдьан эмискэ суох буолар. Бу кэмҥэ аһыыр-таҥнар кыһалҕатыгар ылларан, эдьиийдэрэ Агафья, Ефросинья, быраата Михаил оскуолаттан уурайан, холкуоска үлэлээбитинэн бараллар. Оттон Лизаны Бэрдьигэстээххэ салгыы үөрэттэрэ ыыталлар, онно 1945 с. сэттэ кылаастаах оскуоланы түмүктүүр. Сайын аайы Маҕараска кэлэн бииргэ төрөөбүттэринээн холкуос араас үлэтигэр кыттар.
Эйэлээх олох саҕаланан 1946-1947 сс. салгыы Дьокуускайга педагогическай училищеҕа иитээччи үөрэҕэр киирэр. Ол гынан баран дойдутун ахтылҕана тардан, ыалдьан үөрэҕиттэн уурайан, күһүн төттөрү дойдутугар төннөн кэлэр. 1948 с. олохтоох Сэбиэккэ сэкирэтээринэн, 1949 с. тохсунньутуттан «Кыһыл Сулус» холкуоска суотчутунан үлэтин салҕыыр. Үтүө суобастаахтык үлэлиирин иһин, 1950 с. ахсынньы ыйыттан старшай сэкирэтээринэн уонна үүт тутар цехха приемщигынан ананар. 1954-1959 сс. «Октябрь 40 сыла» холкуоска араас үлэҕэ сылдьар. 1959-1980 сс. Маҕарас бөһүөлэгин дьааһыла саадыгар таҥас сууйааччыннан үлэлиир. Ол кэмнэргэ кинини кытта алтыспыт дьоннор Елизаветаны сымнаҕас майгылаах, ыраас-чэбэр, уурбут-туппут курдук туттуулаах, үлэтигэр олус бэриниилээх этэ диэн, үтүө тылынан ахталлар.
1953 с. олоҕун аргыһын Ноговицын Афанасий Васильевиһы көрсөн, 45 сыл эйэ-дэмнээхтик ыал буолан олороллор. Аҕа ууһун ааттатар, олохторун салгыыр икки уол оҕолоноллор: Роман, Афанасий.
Елизавета Ивановна 1985 с. үлэ бэтэрээнэ ааты ылар, кини үчүгэй үлэтин туоһулуур араас Махтал суруктар, Грамоталар элбэхтэр.
2000 с. 73 сааһыгар сылдьан ыалдьан олохтон туораабыта.
