Ворогушина (Скрыбыкина) Анна Петровна (1937 с.), Таатта оройуонун Саһыл нэһилиэгин "Жданов" холкуоска сэрии сылларын иннинэ төрөөбүт. Аҕата Скрыбыкин Петр Прокопьевич Арҕаа фроҥҥа сулууспалыы сылдьан, сураҕа суох сүппүттэр ахсааннарыгар киирбит. Ийэтэ Мария Николаевна сэрии сылларыгар холкуос солбуллубат ыанньыксыта. Онон сэрии сылларын ыарахан олоҕун эҥэринэн тэлэн Нюта кыыс үлэ диэн тугун билэ улааппыт. Советскай Партийнай оскуоланы бүтэрэн идэтинэн үлэлээн, кэлин ыанньыксыттаан, наставниктаан, "Үлэ Албан аата" III степеннээх уонна "Үлэ Кыһыл Знамята" орденнардаах, 83 саастаах ытык мааны Анна Петровна, РФ Үлэтин уонна тыыл ветерана буолан, Кыайыы 75 сыллаах өрөгөйүн этэҥҥэ көрсөөрү олорор.