Светлана Гаврильевна Винокурова (Слепцова)  1941 сыллаахха балаҕан ыйын  28 күнүгэр Анаабыр улууһун Саскылаах нэһилиэгэр биэлсэр идэлээх Слепцов Гаврил Данилович уонна Тарабукина Аграфена Прокофьевна эдэр ыалга иккис оҕонон күн сирин көрбүтэ. Аҕата Таатта Уолбатыттан, ийэтэ Уус-Тааттаттан төрүттээхтэр. Эдэр дьон Дьокуускайдааҕы фельдшерскай-акушерскай училищены бүтэрэн, хоту оройуоҥҥа анаммыттара. Сэрии кэмигэр Анаабырга үлэлээбиттэрэ. Дьиэ кэргэнинэн 1947 с. Анаабыртан Тааттаҕа, 1950 с. Ударникка көһөн кэлбиттэрэ. Аҕата Гаврил Данилович  «ССРС доруобуйа харыстабылын туйгуна» бэлиэнэн, «Аҕа дойду Улуу сэриитигэр килбиэннээх үлэтин иһин», «В.И.Ленин төрөөбүтэ 100 сыла» мэтээллэринэн, Саха АССР Верховнай Сэбиэтин Президиумун Бочуотунай грамоталарынан (1947 с, 1957 с.) наҕараадаламмыта. Ийэтэ Аграфена Прокопьевна, элбэх оҕолоох ыал хаһаайката, 1-2-3 степеннээх “Материнская слава” бэлиэлээх.  

Светлана Гаврильевна 1961с. Кириэс-Халдьаайы аҕыс кылаастаах оскуолатын үөрэнэн бүтэрбитэ. Оскуолаҕа үөрэнэр сылларыгар физкультура учуутала Семен Егорович Колесовка сүүрүүгэ, баскетболга, волейболга дьарыктаммыта. Сүүмэрдэммит хамаанда солбуллубат чилиэнэ. Ударникка, Кириэс-Халдьаайыҕа оҕо саадтарыгар  ньээҥкэнэн үлэлээбитэ.1966 с. лаборант идэтигэр үөрэнэ киирбитэ. 1968 с. Мэҥэ-Алданнааҕы  арыы собуотугар ананан кэлбитэ. Уус Амма арыы собуотугар лаборанынан, маастарынан үлэлээбитэ. 1976 – 1998 с.с. Мэҥэ-Алдан учаастактааҕы балыыһатыгар 22 сыл санитарканан үтүө суобастаахтык үлэлээбитэ. Оройуоннааҕы партия комитетын, эмп үлэһиттэрин профсоюзнай комитетын хас да төгүл Бочуотунай грамоталарынан бэлиэтэммитэ. Нэһилиэк уус-уран самодеятельноһын, общественнай уонна спортивнай олоҕун  актыыбынай кыттыылааҕа. Агитзона начальнигынан үлэлээбитэ. Үлэ бэтэрээнэ. «Улуу Октябрьскай социалистическай революция 100 сыла», «Сэрии оҕото» өйдөбүнньүк  мэтээллэринэн наҕараадаламмыта.

 Е.Винокурова, Мэҥэ-Алдан