Лукинов Константин Гаврильевич 1915 сыллаахха, Нам улууһун Көбөкөнүгэр Лукинов Гаврил Данилович уонна Арбынтан төрүттээх Иванова Екатерина Павловна дьиэ кэргэннэригэр 20 оҕоттон соҕотох хаалан киһи-хара буолбута. Төһө да соҕотох оҕо буолан атаахтык иитилиннэр, оччотооҕу кэм оҕолорун курдук от-мас үлэтигэр тэҥҥэ сылдьыһара, колхозка үлэлээбитэ. О5о эрдэ5иттэн сүрдээх эрдэһит, туругас-олоругас, сымса-мэник, бэйэтин аһара кыанар уол буола улааппыта. Хатырык оскуолатыгар үөрэнэн 4 кылааһы бүтэрбитэ.

Поротова Мария Николаевнаны кэргэн ылан, ыал буолан олорон истэхтэринэ, кэргэнэ ыалдьан күн сириттэн барбыт. Онон, биир уол оҕолоох огдообо хаалбыта. 1940 сыллаахха Ильина Вера Ильиничнаны кэргэн ылбыта. Күөгэйэр күнүгэр, оту-маһы турута тардар эрчимнээх сааһыгар сылдьан, 1942 с. бэс ыйыгар II-с хомуурга хабыллан, 6 ыйдаах кыыс оҕотун, 5 саастаах уолун, таптыыр кэргэнин, ийэлээх аҕатын хаалларан Ийэ дойдубутун көмүскүү  киэҥ айан суолугар туруммута.

Сэриигэ арҕаа үһүс Белорусскай фронт иккис гвардейскай Тацинскай танковай корпус 273-с миномётнай полкатыгар  миномётчигынан сылдьыбыта. Александр Невскэй орденнаах албан ааттаах полкатын кытта Ийэ дойдутун ытык кирбиилэрин кыр өстөөҕүттэн ыраастаабыта, Венаны, Будапеһы босхолоспута, Кёнигсберг килэҥ таас куйаҕын үрэйсибитэ. Ельня куорат аннынааҕы хаан тохтуулаах кыргыһыыга “Хорсунун иһин” медалы ылбыта, иккис медалын Илиҥҥи Пруссия куораттарыттан биирдэстэрин иһин хабыр киирсиигэ харса суоҕун көрдөрөн кэтит түөһүгэр иилиммитэ. Ийэ дойдутун иннигэр ытык иэһин чиэстээхтик толорбутун туһунан 1945 с. Илиҥҥи Пруссияттан дойдутугар сурук ыыппыта. Оройуон “Колхоз сирдьитэ” хаһыатыгар “Төрөөбүт дойдубар” диэн хоһооно ити дьыл атырдьах ыйын 24 күнүгэр бэчээттэммитэ:

Үс үллэр күүгэн үөстэрдээх,

Өрө тэбэр өлгөм сүүрүктэрдээх,

Өрөгөйдөөх Өлүөнэ хотун

Кылыстаах долгуна кырбаһа,

Кылбайа, ыллыы-туойа, ыһыалана,

Айаным аартыгар атаарбыта.

Эдэр сааһым уордаах эрчимигэр,

Дьылым-күнүм эҥсэр долгунугар

Сэрии үс сыллара сатарааннар

Кыргыһыы сиригэр ааспыттара.

Пушка, танк, пулемёт, самолёт

Немец арҕаҕын үрэйбиттэрэ.

Төрөөбүт дойдум Саха сирэ,

Үөрэр-көтөр хотун Өлүөнэ,

Үрдүк сураххытын сууйбатым,

Өрөгөйдөөх ааккытын алдьаппатым.

Сталин барҕа махтала:

Түөспэр күлүмнүүр медаль.

Соһумар суос-суолтан ордоммун

Кыайыы дьарылыга кынаттаан,

Үөрбүт сүрэх аргыстанан

Төрөөбүт алааспар тиийиибэр

Арыынан, сыанан, кымыһынан ууна

Тапталлааҕым күлэ-үөрэ көрсүөҕэ.

Сэрииттэн эргиллэн кэлээт 6 ыйдаах кууруска үөрэнэн, төрөөбүт нэһилиэгэр “Коминтерн” колхозка биригэдьииринэн, правление председателинэн, партийнай тэрилтэ секретарынан, Көбөкөн, Арбын нэһилиэктэригэр совет исполкомун председателинэн өр сылларга үлэлээбитин дьоно-сэргэтэ үтүө тылынан махтана ахталлара. Кэргэнинээн эбии 3 уолланан, кыыстанан, барыта биэс оҕолонон, олус иллээхтик олорбуттара. Киһи быһыытынан сүрдээх сэмэй, үтүө майгылаах этэ. Сэриигэ сылдьыбыт сылларын туһунан мээнэ ыһа-тоҕо кэпсии сылдьыбат этэ, арай түүн үгүстүк баттатан уһуктара үһү. 1962 с. атырдьах ыйыгар олус соһумар ыарахан ыарыыттан хомолтолоохтук олохтон туораабыта.

Биһиги, үлэни эрэ өрө тутан иллээхтик олорбут, күндү дьоммут үтүө-сырдык мөссүөннэрин өйбүтүгэр-сүрэхпитигэр иҥэрэн, кинилэр олохторун салгыыбыт, үйэтитэргэ кыһаллабыт.

Оҕолоро, сиэннэрэ, хос сиэннэрэ

Ыам ыйа 2020 с.