Поликарп Михайлович Башарин 1926 сыллаахха Таатта Баайаҕатыгар Чыллахы диэн сиргэ төрөөбүтэ. Ийэтэ – Андросова Степанида Ивановна, аҕата – Башарин Михаил Петрович. Бииргэ төрөөбүт бэһиэлэр этэ: Василий, Параскевья, Поликарп, Клара, Ева. 1931 сыллаахха аҕалара күн сириттэн күрэнэн, ийэлэрэ быыкаайык оҕолордоох огдообо хаалар. Ол иһин Поликарп оскуолаҕа үс эрэ кылаас үөрэнээт, 13 сааһыттан колхозка илии үлэтигэр үлэлээбитэ. “Саҥа Олох” колхоз эр дьоно Уус Таатта нэһилиэгиттэн бурдугу салаасканан соһууларыгар сылдьыспыта.
18 сааһын туолуута, 1944 сыллаахха бэбиэскэ тутан, Иркутскай уобалас Мальтатыгар байыаннай үөрэххэ бэрт кылгастык үөрэнээт, Даурияҕа (Илин границаҕа) тиийэн 582-с СП тубэспитэ. Манна сылдьан кыайыы буолбутун истибитэ. Сэрии кэнниттэн Корея столицата Пхеньян куоракка 3 сыл авиация рабочай батальонугар сулууспалаабыта. “Японияҕа Хинган хайаларын туораан, Хайлар, Харбин, Мугден, Чаньчунь куораттарга сэриилэспиппит. Чаньчуҥҥа тиийэн 150 тыһыынча билиэннэйи хомуйбуппут. Биһиги батальоммут билиэннэйдэри харабыллаабыта, уонна Россияҕа аҕалан, Чита куоракка туттарбыппыт,” – диэн ахтара.
Сэриигэ килбиэнин иһин Аҕа Дойду Сэриитин II истиэпэннээх уордьанынан, “Японияны кыайыы иһин”, “Хорсунун иһин”, “Кореяны босхолооһун иһин” мэтээллэринэн наҕараадаламмыта.
Поликарп Михайлович 1950 с. дойдутугар кэлбитэ. Бастаан таһаҕасчытынан, онтон фермаҕа от тиэйээччинэн, сайынын бастайааннай көлө косилкаһытынан үлэлээбитэ. Христофорова Степанидалыын ыал буолан олорбуттара да, Степанида ыалдьан олохтон туораабыта. Иккиһин Белолюбская Анна Петровналыын холбоһон, 1958 сыллаахха уоллара Петр күн сирин көрбутэ. Оҕолоро 4 саастааҕар Анна Петровна тыҥа ыарыыта буолан суорума суолламмыта. Үсүһүн Слепцова Мария Ивановналыын олохторун холбоон, дьоһун-мааны ыал буолан, кырдьар саастарын бииргэ көрсүбүттэрэ. Поликарп Михайлович балтытын Ева бэһис оҕотун Еленаны иитэ ылбыттара.
1971 сыллаахха атаҕынан оһоллонон уурайыар диэри сылгыһытынан улэлээбитэ. II группалаах инбэлиит этэ. Сылгыһыттыыр кэмигэр куруук бастыҥнар кэккэлэригэр сылдьыбыта, хаста да ВДНХ-ҕа ыҥырыллан баран барбатаҕа. Эһээбит сыралаах үлэтин үрдүк сыанабыла – бочуотунай грамоталара билигин да бааллар. Бултуурун туохтааҕар да ордороро. Сыл аайы сир көҕөрүүтэ сайылыктарыгар – “Саҥа Олох” колхоз сиригэр көһөн тахсаллара. Поликарп Михайлович сэрии уот кутаатыгар сылдьан кэлбит киһи быһыытынан, кытаанах, “армейскай” майгылаах этэ, эппитин толотторон баран тэйэрэ. Уола Петр суоппар этэ, 5 оҕо амарах аҕата. Кыыстара Елена билигин бэйэтэ элбэх оҕолоох ыал ийэтэ, эбэтэ, идэтинэн учуутал.
Поликарп Михайлович оҕо эрдэҕиттэн ыарахан үлэттэн чаҕыйбакка, сэрии ыар тыынын этинэн-хаанынан билэн ааспыт олоҕун кэлэр көлүөнэлэрэ – сиэннэрэ, хос сиэннэрэ өйдүү-саныы сылдьыахтара.
Источник:
Баайаҕалар сэрии сылларыгар / Т.И. Андросова, Л.В. Андросова, М.Р. Егорова. – Дьокуускай : Бичик, 2010.
Башарина З.Г., Пахомова Е.П. ахтыылара
