Алексеева Мария Сергеевна, заслуженный учитель РФ.

Мин а5ам, Габышев Сергей Устинович, үлэни кыайар, дьон кэпсээнинэн, уҥуоҕунан улахан, модьу-таҕы көрүҥнээх, сутуруктара “баччыр оҕо төбөтүн саҕа”, тиит мас да үрдүгэр сууллуннаҕына өлбөт киһитэ үһү.

Аҕам сыл аайы Аaллаах Үүнүнэн Охотскай перевозка хас да сыарҕалаах атынан таһаҕас таһыытыгар сылдьар эбит үһү. “Саха Сирэ’’ хаһыакка “Саһарбыт хаартыска тугу кэпсиир?” диэн рубрикаҕа Егор Местников диэн киһи Чурапчыттан “Айаньыттар” диэн хаартыскалаахиыстатыйатыгар “...Хаҥаластан биригэдьиир Габышев Сергей Устинович” диэн аҕам баарын ыйбыт этэ. Ити хаартыскаҕа олунньу 20 күнүгэр 1942 с. Түспүттэр. Ол аата Ааллаах Үүҥҥэ тиһэх сырыыта этэ.

Эһэм (а5ам а5ата) сайын балыктыыра, бултаабыт балыгын дэриэбинэ ыалларыгар кими да матарбакка түҥэтэн биэрэр идэлээҕэ. Селькор Н.А. Николаев улуус хаһыатыгар ахтыытыттан биэрэбин: “Устин Петрович атын оҕонньортон олоҕу атыннык көрөрүнэн уратылааҕа. Кинини кытта сэргэ бултуур Сиинэ, Мураан оҕонньотторо балыктарын борокуот дьонугар бэрт ыарахан сыанаҕа атылыыллара. Оҕонньор күһүн бултуу тахсарыгар дэриэбинэ ыала бары атаарара. Өлгөмнүк бултуй диэн алгыыллара. ...Хаһан да оскуоланы быһа ааспат үгүстээҕэ. Оҕолор кинини сэһэнин олус болҕойон истэллэрэ. Бултуур ыараханын, сындылҕанын билсэллэрэ. Уолаттар дьиэ таһыгар куобахха чааркаан туорары олус сөбүлүүллэрэ. Оҕонньор оҕолору үчүгэйи –куһаҕаны араарга кырав эрдэхтэн уһуйара...”

А5абын гытта бииргэ сэриилэспит биир дойдулааҕа Еремеев А.А. дьоҥҥо кэпсииринэн: “...Тулабытыгар ытыалаһыы, миинэ эстиитэ. Миигиттэн тэйиччи, иннибэр улахан мас анныгар Сэргэй пулеметунан ыта сытара. Өстөөх самолеттара кэлэн буомбалаан барбыттарын кэнниттэн төбөбүн өҥдөтөн көрбүтүм, үөһээттэн били улахан маһым үлтүркэйдэрэ, дьон сэмэйэхтэммит этэ-сиинэ түһэн иһэллэр. Сэргэй ханна да суох этэ”. А.А. Еремеев кэпсээнинэн, ити Сталининград анныгар буолбут Д.Д. Петров “Якутия в годы Великой Отечественной войны” диэн кинигэтигэр Саха сириттэн 1942 сыллаахха барбыт дьон үксэ Сталинградка атаарыллыбыттар.

Ити түбэлтэ документальнай туоһута суох. Мин военкомат нөҥүө ыйытык оҥорторо сылдьыбыппар: “…пропал без вести в октябре 1942 года…”, “...погиб в октябре 1942 г., место захоронения не установлено” диэн эппиэттэр кэлбиттэрэ. Сэриилэспит чааһын нүөмэрэ да, ханнык сиргэ сэриилэһэ сылдьан суох буолбута да ыйыллыбатах этэ.

Сылын ахсын Кыайыы күнүгэр аҕам уҥуоҕар кэлэн барар курдук сананан, мемориалга аҕам аатыгар сибэкки ууран, бэйэбит туспунан кэпсээн дьоммунан кэлэн барааччыбыт.