Мин аҕам

Мин аҕам Семенов Давыд Николаевич 1907 сыллаахха Кэнтик нэһилиэгэр төрөөбүт. Бииргэ төрөөбүттэр үстэр эбит. Мэтэкиитэ диэн убайдаах уонна эдьиийин аатын билбэппин. Бүлүү куоратыгар олорон өлбүтэ. Мин иитиийэх оҕо буоламмын төрдүлэрин-уустарын үчүгэйдик билбэппин. Биир да уруута суох быһыылааҕа. Тастыҥнартан Хайбалар, Сонтохолор урууларым диэччи. Аҕам 1943 сыллаахха армияҕа ыҥырыллан 2 сыл сулууспалаабыт 386 нүөмэрдээх Забайкальскай фронт стрелковай подразделениятыгар. Сылгыга сыстыҕас буолан конюхтаабыт, Ворошиловскай стрелок этэ. 1945 сыллаахха Японскай сэриигэ 2 ый сэриилэспитим диэччи. Ити сэрии кэнниттэн дьиэтигэр төннөн кэлбит. Сэрииттэн кэлэн баран Дагаярова Кэтэриинэ диэн сэрии огдооботун кэргэн ылбыт. Иккиэн оҕото суох буоланнар, 1946 cыллаахха көмүсчүт Тюляхова Федора Игнатьевнаттан миигин 5 хонуктаах оҕону ииттэ ылбыттар. Ас-таҥас суоҕун кыһалҕатыттан Кэнтиктэн 8 көстөөх сиргэ сылгыһытынан, ийэм субай көрөөччүнэн көспүттэр. Куунуга мин 16 сааспын туолбутум кэннэ Харыйалаахха көһөн киирбиппит. Кыһын оскуолаҕа үөрэнэр буолан мин Үөһээ-Бүлүүнэн, Кэнтигинэн үөрэммитим. Аҕам булчут буолан булт этинэн аһаан улааппытым. Куобах, мунду, мас көтөрө аһылыктаах буоларбыт. Бииир ынахтаах буолан үрүҥ ас эмиэ баара. Дьонум үтүөтүнэн бачча сааспар кэллэҕим диэн махтана саныыбын. Аҕам миигин туһахтыырга үөрэтэрэ. Мас көтөрө бөҕөнү туттарар буоларым. Тиргэлииргэ эмиэ уөрэтэрэ. Билигин ол дьарыкпын олох умнубуппун. Сайынын куһу сөп буоларынан өлөрөрө. Отчуттар бөҕө кэлэн бары бииргэ күннээҕиннэн бултууллара, күн аайы саа ииттэллэрэ. Аҕам үйүтэтин тухары аттаах буолара. Атынан отун-маһын тиэйэрэ. Иккиэк оттуур буолар этибит. Кэлин мин улахан уолбунаан Сашалыын оттуур буолтара. Аҕам ийэбинээн олус иллээхтик олорбуттара. 70-нарыгар диэри ынахтаах этилэрэ. Атын өлүөн 2 сыл иннинэ сиэбиппит. Олус кырдьыбытын иһин буолуо.

Аҕам 76 сааһыгар күн сириттэн барбыта.