Мин 1915 сыллаахха сэтинньи 18 күнүгэр Куолаҕай диэн сиргэ төрөөбүтүм. Ийэм Иванова Евдокия Гаврильевна, аҕам Иванов Николай Иванович этилэрэ. Мин кыра эрдэхпиттэн Оҥхой күөлүгэр олорбуппут. Аҕам хара үлэһит этэ, биир кылаас үөрэхтээҕэ. Ийэм дьиэтин дьиэлээн олорбута, кини сүрэҕинэн ыалдьар этэ. Биһиги бииргэ төрөөбүттэр иккиэбит. Балтым Иванова Матрена Николаевна 1918 сыллаах төрүөх. Кыра эрдэхпиттэн от оттуур этим, аҕабын кытта. Аҕам куоракка баайдарга киирэн үлэлиирэ. Расторгуев, Дигиэтэп диэн атыыһыттарга үлэлээн, айахпытын ииттэн олорбуппут. Онно үлэлээн атыыһыттар оҕолорун кыччаабыт таҥастарын биһиэхэ ыытара. Оннук 10 сааспытыгар диэри ииппитэ. Онтон уончабытыттан аҕабар от охсорго, мунньарга көмөлөһөр этим. Мин үөрэммэтэҕим, балтым 5 кылаастаах начаалынай оскуолаҕа үөрэммитэ.
Аҕам ол атыыһыттарга иккилээхпиттэн уоммар диэри үлэлээбитэ. Кини чаччыына буола сылдьыбыта. Мин 18-пар «Табаарыстыба» диэн тэриллэ сылдьыбыта, онно арааһынай үлэлэргэ үлэлээбитим. 1935 сыллаахха «2 Пятилетка» колхоз «Ыттаахха», онно биһиги атын ыаллары кытта киирбиппит, колхозка биир ынаҕы биэрбиппит. Аҕам колхозка сайынын окко үлэлиирэ, кыһын үлэлээбэт этэ, ийэбэр көмөлөһөрө. Балтым манна төрдүһү бүтэрэн баран, Хампаҕа 5-с кылааска үөрэнэ барбыта. Онтон ийэбит өлөн, 5-с кылааһы бүтэрэн, төннөн кэлбитэ. Колхозка миигин үлэ кытаанаҕар ыыталлар этэ. Оччолорго колхоз председателэ – Прокопьев Сэмэн (Сырааннаах Сэмэн). Бу манна сылдьан, сайын устата 40 гааны охсорум. 10 хонукка Стахановскай декада диэни оҥороллоро, онно гааттан ордуктууну охсор этим. Бурдук ыһарга табанан боронолуур этибит. Мин стахановец этим. Ас-таҥас тиийбэт этэ. Ынах тириититтэн тигиллибит этэрбэһинэн сылдьааччыбыт, сайын үксүн атах сыгынньах барааччыбыт. Онтон кыһын сылгы тириититтэн тигиллибит этэрбэһи кэтээччибит.
Сырдык күҥҥэ этиҥ эппитинии Аҕа дойду сэриитэ саҕаламмытын туһунан истибиппит. 1942 сыллаахха сэриигэ ыҥырыллан баран төннөн кэлбитим. Онтон 1943 сыллаахха бэс ыйыгар дьэ барбытым. Онно тиийэн, Догорье диэн чааска түбэспитим. 1945 сылга диэри Японияны харабыллаабытым. Улуу Кыайыы күнүн Догорьеҕа ылбытым. Дьэ, «Ураа!” хаһыы бөҕө буолбуппут. Дьоппуон сэриитигэр 1945 сылга от ыйыгар киирбиппит. Онтон күһүн Японияны кыайан чааспытыгар Догорьеҕа кэлбиппит. 1946 сыллаахха биир ый госпитальга сыппытым. Онтон Улан-Удэҕа тиийэн, боробуос оҥорор сыахха үлэлээбитим. Онно байыаннай чаас баара. 200 солкуобайы бириэмийэ ылар этим. Догорьеҕа чааспар «Победа над Японией», «Победа над Германией» мэтээллэри биэрбиттэрэ. Онтон Улан-Удэттэн 1947 сыллаахха дойдубар эргиллэн кэлбитим. Бүлүүгэ олунньу 11 күнүгэр байынкамаакка учуокка турбутум. Салгыы «2 Пятилетка» колхозка үлэлээн барбытым. 1950 сыллаахха «Ворошилов» уонна «2 Пятилетка» колхозтара холбоспуттара. Онно даҕаны араас үлэни үлэлээн сылдьыбытым. Колхозтан пенсияҕа тахсыахпар диэри звеневодтаабытым. 1955 сыллаахха ВДНХ-ҕа бара сылдьыбытым. 1956 сыллаахха партия кэккэтигэр киирбитим.
Аҕа дойду сэриитин ветерана Иванов Михаил Николаевич ахтыытыттан
1990 сыллаахха сиэнэ Гульнара Осипова суруйуута.
