Аҕа Дойду сэриитин кыттыылааҕа, буойун ИННОКЕНТЬЕВ МАТВЕЙ НИКОЛАЕВИЧ 1919 сыллаахха Тылгыныга Баҕадьаҕа төрөөбүтэ. Ийэтэ Ала кыыһа Анна - Филиппов Г.Р. эһэтэ Дьарааһын убайын кыыһа. Төрөппүт аҕата - Иванов Семен (Чыыраа Сэмэн). Аҕата Үөһээ Бүлүүгэ көһөн барарыгар уолун оҕото суох Иннокентьев Николайга ииттэрэ хаалларбыта. Матвей Николаевич сэттис кылааһы бүтэрэн баран, 1938 сыллаахха Үгүлээт оскуолатыгар учууталлаабыта. Онтон Дьокуускайдааҕы пединституту бүтэрбитэ. Бүлүүгэ РОНО начаалынньыгынан үлэлии сылдьыбыта. 1942 сыллаахха аармыйаҕа ыҥырыллан баран, доруобуйатынан сыыйыллыбыта. Онтон 1944 сыллаахха бэс ыйын 21 күнүгэр иккистээн ыҥырыллан аармыйаҕа барбыта. Илиҥҥи фроҥҥа Японияны кытта сэриигэ кыттыбыта. Военкомакка баар сибидиэнньэнэн ыскылаат харабыллааһыныгар сулууспалаабыт. 1945 сыллаахха сулууспалаан бүтэн кэлбит. Матвей Николаевич бастакы кэргэнэ Ханды Софья Гаврильевна. Оҕото суох буолан арахсыбыттар. Иккис кэргэнэ нуучча кыыһа Подгорнова Галина Федоровна. 1955 сыллаахха икки игирэ уол оҕоломмуттар. Уолаттар улаатан баран авиационнай училищены бүтэрбиттэр. Матвей Николаевич кэргэнэ Галина Федоровна оҕолоро кыраларыгар арахсыбыттар. Аҕалара оҕолорун кытта сибээһин быспатах. Матвей Николаевич олоҕун улахан аҥарын Үгүлээт оскуолатыгар дириэктэринэн, завуһунан, учууталынан үлэлээбит. Үгүлээт кыыһын Федорова Марияны кэргэн ылан икки кыыс, биир уол оҕоломмуттар. Тылгыныга төрдө-ууһа: Уһун Уйбаан. Уһун Уйбаан оҕолоро: Дьээлигир Уус кэргэнэ (Үгүлээккэ олорбут), Титирик Ньукулай, 1857 сыллааҕы төрүөх (Федоров Н.И. ийэтин аҕата), Никииппэр, 1856 сыллааҕы төрүөх (Филипповтар эһэлэрэ Куонаан аҕата), Логлор Хабырыыл уо.д.а.. Чыпаалыыр Уйбаан ыччаттара, Семенов Василий Тарасович уонна Евдокия оҕолоро, сиэннэрэ, Евдокия аймахтара Матвей Николаевич чугас аймахтара буолаллар. Буойун-учуутал Иннокентьев Матвей Николаевиһы Тылгыныга умнубаппыт.