Гаврил Архипович Петров 1924 с. төрөөбүт, 1943 сыллаахха Аҕа дойду сэриитигэр барбыта. Арҕаа фроҥҥа Витебскэй туһаайыыга кыргыһыыга сылдьан, хаҥас илиитин оскуолкаҕа быһа тэптэрэн, 1944 сыл кулун тутарга ахтылҕаннаах дойдутугар эргиллибит. Ол туһунан: «Витебскай туһаайыыга (Белоруссия) биэс төгүл кыырыктаах кыргыһыыга киирэн таҕыстым. Алтыс киириибэр, 1944 с. олунньу 6 күнүгэр, снаряд оскуолката харым биир утаҕын быһа көтүттэ. Чэпчэки баас, тиллэ охсон фроҥҥа барар баҕалаахпын. Кыайыы бөҕө буолан эрэр»- диэн ити дьыл кулун тутарга Казань куорат госпиталыттан суруйбут. Салгыы сэриилэһэр кыаҕа суох буолан, байыаннай врачевнай комиссиянан сыыллан, ахтылҕаннаах дойдутугар эргиллэр. Кэлэн, 1945 с. Герасимова Ульяна Романовна диэн Тааттыныскай кыыһын кэргэн ылан, биир уол оҕоломмуттара. Илиитэ төһө да көнтөс буоллар, убайбыт сорсуннаах булчут этэ. Өр сылларга холкуоһугар кадровай булчутунан үлэлээбитэ. Тапталлаах Тааттатын кэрэ айылҕатыныын алтыһан, булт алыбар, имэҥэр ылларан байанайдаах булчут дэппитэ. 1952 с. бастакы кварталыгар былаанын 232% толорон, оройуон бочуотун дуоскатыгар тахсыбыта.

Ильина Октябрина Михайловна, "Сырдык ааттарын үйэтитэн" кинигэттэн