Сэрии бэтэрээнэ, буойун ИВАНОВ АЛЕКСЕЙ ИВАНОВИЧ Тылгыныга 1906 сыллаахха төрөөбүтэ. Кини фроҥҥа 1943 сыл бэс ыйын 13 кунугэр ыҥырыллыбыта. Японияны кытта сэрии кыттыылааҕа.  Алексей Иванович мотострелковай полкаҕа стрелогунан сулууспалаабыта.  Сэрииттэн 1945 сыллаахха дойдутугар эргиллэн кэлбитэ. Дойдутугар эргиллэн кэлээт, колхозка үтүө суобастаахтык үлэлээбитинэн барбыта. Иванов А.И. кэргэнэ Анна Иннокентьевна 1907 сыллаахха Тылгыныга төрөөбүтэ. Кинилэр Толоонунан, Бэрэнэн олорбуттара. Анна эрдэ тулаайах хаалан олох ыарахаттарын барытын санныгар сүгэн улааппыта. Кини сытыы-хотуу үлэһит буолан, эппиэттээх үлэлэргэ ыытыллан үлэлиирэ. Сэрии сылларыгар Анна Иннокентьевна ырбыт-дьудэйбит дьону өйүүр, аһатар интернакка поварынан үтүө суобастаахтык үлэлээбитэ. Ивановтар биир уол, икки кыыс оҕоломмуттара. Елизавета Алексеевна, Александра Алексеевна Дьокуускайга олороллор. Варя диэн кыыс оҕону бэйэлэрин оҕолорун курдук көрөн-харайан  улаатыннарбыттара.  1974-1975 үөрэх сылыгар начаалынай кылаас учуутала Васильева Мария Спиридоновна үөрэтэр оҕолорун, биһигини, Алексей Ивановиһы кытары көрсүһүннэрбитин өйдүүбүн. Ол көрсүһүүгэ эрдэттэн бэлэмнэммиппит. Ыалдьыппыт, сэрии бэтэрээнэ, үөрдүн диэн - кылааһынан кисет тикпиппит. Ол кисеты быысыбайдаабыппыт. Кыһыл сулус ойуулаах этэ (мин өйдүүрбүнэн). Алексей Иванович кэлэн сэрии сылларын, нэһилиэгэр олорор сэрии бэтэрээннэрин туһунан кэпсээбитэ. Тылгыны төрүт олохтоохторо Анна Иннокентьевна уонна Алексей Иванович сиэннэрэ билигин өрөспүүбүлүкэ араас муннуктарыгар үлэлии-хамсыы сылдьаллар. Тылгыныга эһэтин аатын сүгэр Иванов Алексей Иванович -  ыал, Слава олороллор.  Алексей РЭС учаастагар эппиэтинэстээхтик үлэлиир. Ивановтар сиэннэрэ, хос сиэннэрэ төрүттэрин ааттарын ааттаталлар, олохторун салгыыллар. Сэрии бэтэрээнэ Иванов Алексей Иванович аата төрөөбүт дойдутугар умнуллубат.

Христина Васильева, Тылгыны администрацията