Сэрии бэтэрээнэ, сержант, буойун ВАСИЛЬЕВ ИГНАТИЙ ПРОКОПЬЕВИЧ 1926 сыл ахсынньы 14 күнүгэр Тылгыныга төрөөбүт. Кыратыттан тулаайах. Аҕата Мондохо Борукуоппай (Борисова Анастасия Петровна ийэтин Огдооччуйаны кытта бииргэ төрөөбүт киһи кини үс саастааҕар өлбүт. Эдьиийэ Огдооччуйалаахха олорбуттар.  Эдьиийэ 1932 сыллаахха өлбүтүн кэннэ ийэтинээн арахсан атын-атын ыалларга олорбуттар. Ыарыһах ийэтэ 1943 сыллаахха ыалтан-ыалга олорон өлбүт. Игнатий Прокопьевич Бүлүүгэ училище иккис курсугар үөрэнэ сылдьан, 1944 сыллаахха армияҕа ыҥырыллыбыт - Японияны утары сэриигэ кыттыбыт. Гавриил Иосифович Чиряевы кытта бииргэ сулууспалаабыттар. Сэрии кэнниттэн Васильев И.П. 1950 сыллаахха партия чилиэнинэн киирэр. 1959-1962 сылларга советскай партийнай оскуоланы үөрэнэн бүтэрбитэ. Өр сылларга Өлөөн, Эдьигээн, Өлүөхүмэ оройуоннарын партийнай комитеттарыгар салайар үлэҕэ үлэлээбитэ. Араас оройуоннарга үлэлии сылдьан, дойдутун дьонугар көмө-тирэх буолбута элбэх. Өлүөхүмэҕэ олорор кэмигэр сельхозтехникумҥа үөрэнэ тиийбит оҕолорго аҕа саастаах убай истиҥ сыһыанын бэлэхтээбитин дьон-сэргэ ахтар-саныыр. Васильев И.П. Аҕа Дойду сэриитин иккис степеннээх орденынан, "Германияны кыайыы иһин", "Японияны кыайыы иһин" мэдээллэринэн  наҕараадаламмыта. Кини олоҕун кыыһа, сиэннэрэ салгыыллар (кэргэнэ Жиркова Е.В.). Тылгыныга аймахтара Борисова А.П. оҕолоро буолаллар. Игнатий Прокопьевиһы кытта биир аҕалаах убайынан Филиппов Г.Р. буолар. Сэрии кыттыылааҕа Васильев И.П. аата Тылгыныларга умнуллубат.