Сэрии бэтэрээнэ, буойун ДЕЛЯЕВ ЕГОР ФЕДОРОВИЧ 1917 сыл тохсунньу 9 күнүгэр Тылгыны нэһилиэгэр  төрөөбүтэ. Эһэтин, аҕатын олорбут өтөхтөрө Илин Эбэҕэ Суон Билии уонна Мөрөөйү икки ардыгар баар. Егор Деляев 1936 сыллаахха "Күүс түмүүтэ" колхозка киирбит. Кыһынын Өлөөҥҥө таһаҕас таһаллар эбит. Повестканы 1941 сыл атырдьах ыйын 28 күнүгэр ыраах үлэлии сылдьан туппут. Дьиэлэригэр таарыйтарбакка даҕаны куоракка киллэрбиттэр. Иркутскайга Мальта диэн сиргэ кылгас кэмҥэ үөрэтэ түһээт, Харьковка илдьибиттэр. Тиийээт Харьков анныгар улахан кыргыһыыга кыттыбыта. Егор Федорович сэрииттэн 1943 сыллаахха улаханнык бааһыран эргиллэн кэлбит. Кини кэргэнин Христина Петровнаны кытта алта оҕолоохтор. Ийэлэрэ эрдэ өлөн, оҕолорун аҕа бэйэтэ ииппит. Егор Федорович оҕолорун барыларын атахтарыгар туруоран, үөрэхтээх киһи оҥортообут. Киһи быһыытынан борустуой, чиэһинэй, дьоҥҥо эйэҕэс сыһыаннаах үтүө киһи этэ диэн дьон-сэргэ кинини ахтара. Деляев диэн эһэлэрин "Дэлэй" диэн хос аатын араспаанньа гыммыттар эбит.  Деляевтар Тылгыныга аймахтара Чоккурдар, Муҥхаһыт Баһылай, Болооччу-Алексеев Герасимнаах сыдьааннара буолаллар. Бүлүүгэ уола Деляев Николай Егорович олорор. Деляев Е.Ф. Аҕа Дойду сэриитин 1 степеннээх орденынан, "Хорсунун иһин", "Германияны кыайыы иһин" мэдээллэринэн наҕараадаламмыта. Буойун Деляев Н.Ф. аата дойдутугар умнуллубат.