Сэрии бэтэрээнэ, буойун ВАСИЛЬЕВ ЕГОР ВАСИЛЬЕВИЧ 1904 сыллаахха Тылгыныга төрөөбүтэ. Егор Васильевич аҕыс бииргэ төрөөбүттэртэн кэлин соҕотох хаалбыт киһи. Хабырыыл диэн быраата сэриигэ өлбут, атыттара эдэр саастарыгар ыалдьан өлбүт. Сэриигэ 1942 сыл бэс ыйыгар барбыт. Егор Васильевич бэйэтин ахтыытыгар "...Мин бэйэм биир да буукубаны билбэт этим. Ол сэриигэ да баран тугу да билбэккин, нууччалары кытта кыайан кэпсэппэккин, ханна да тугу да гынаргын билбэккин... оннооҕор ханна сэриилэспиппин билбэппин. Ол кэлин докумуоҥҥа суруллубутунан эрэ билэҕин. ... Үрэх баһыгар сыппыт үөрэҕэ суох сахаҕа сүрдээх ыарахан этэ."- диэн суруйбут. Кини Калининскай фроҥҥа (ахтыыга итинник суруйбут), Ленинград аттыгар сэриилэспитэ. Сэриигэ бииргэ сылдьыбыт биир дойдулаахтара, саха уолаттара сырдык тыыннара бысталларын көрөн, олоҕун устата онтон санаарҕыыра. Тимофеев Василий Спиридоновиһы, Захаров Иван Николаевиһы, Өлүөхүмэ уолаттарын куруук санааччы. Унаров Архип диэн сэриигэ бииргэ эрэйи-муҥу тэҥҥэ сүкпүт биир дойдулааҕа сэрииттэн эргиллэн кэлэн баран Бүлүүгэ олорон 1989 сыллаахха өлбүт эбит. Егор Васильевич биир сыл кэриҥэ госпитальга эмтэнэн баран сэрииттэн 1943 сыллаахха иккис группалаах инбэлиит буолан  эргиллэн кэлбит. Васильев Е.В. Аҕа Дойду сэриитин орденынан, юбилейнай мэдээллэринэн наҕараадаламмыта. Кини кэлээт колхоһугар үлэлээбитинэн барбыт. "Филиппов Г.Р. кытта бииргэ үлэлэһэн биригэдьиирдээбитим, ... кэлин таба биригэдьииринэн үлэлээбитим" диэн ахтыытыгар  суруйбут. Кэлин совхозка куонньугунан үлэлээн баран 60 сааһыгар пенсияҕа тахсыбыт. Егор Васильевич оҕолоро Гаврил Егорович, Октябрина Егоровна, Мария Егоровна, Елизавета Егоровна бары үтүө-мааны үлэһит дьон буола улааппыттара. Егор Васильевич олохтон 98 сааһыгар ыалдьан туораабыта, кини олоҕун үгүс сиэн, хос сиэн, хос-хос сиэн  ыччаттара салгыыллар. Буойун Васильев Егор Васильевич аатын дойдутун дьоно-сэргэтэ умнубаттар.