Васильев Василий Петрович - Аҕа дойду Улуу сэриитин кыттыылааҕа.

         Василий Петрович 1903 сыллаахха  Ньурба оройуонун Үөдэй нэҺилиэгэр    төрөөбүтэ. Кыра  эрдэҕинэ  тулаайах  хаалан, ыалга  иитиллибит. Онон оҕо сааҺыгар элбэх эрэйи, кыҺалҕаны  көрсүбүт. Хойут улаатан  баран  ликбезкэ үөрэнэн сахалыы ааҕар уонна суруйар буолбута. 1931-1934сс. Оӊхой нэhилиэгэр колхоз председателинэн  улэлээбитэ. Кэлин  40-с сылларга  нэhилиэк Советын исполкомун председателинэн, ол кэннэ оруйуон Сэбиэтин исполкомун инспекторынан үлэлээбит.

         Кини  Үөһээ Бүлүү оройуонугар I Үөдүгэй нэһилиэгэр Совет председателинэн үлэлии олордоҕуна 1943с. бэс ыйын 15 күнүгэр  сэриигэ  ыҥырыллан  барбыт.  Бастаан кинини үлэҕэ диэн ааттаан Кемеровскай уобаласка, онтон 1944сыллаахха атырдьах ыйыгар  уоттаах  сэриигэ ыыппыттар. Онно пехотнай II Украинскай фроҥҥа сылдьыбыта.  Польшанан Украинанан айаннаан  Одер өрүһү туораабыттар. 1945 сыл олунньу ыйга өстөөх пушкатын көлүөhэтэ атаҕын тосту көтөн  ааспыт.  БааҺыран Польшаҕа госпитальга өр кэмҥэ эмтэммит.

         Василий Петрович ыам ыйын 9 күнүгэр Улуу Кыайыы күнүн Польшаҕа көрсүбүт.  Кини үтүөрэн төрөөбүт  дойдутугар 1945сыл сэтинньи 5 күнүгэр тыыннаах эргиллибитэ. Дойдутугар эргиллэн  кэлэн, араас  советскай партийнай салайар үлэлэргэ үлэлээбит. Ол  курдук Оӊхойго, Мэйиккэ, Далырга барыта 25 сыл Совет председателинэн эҥкилэ суох үлэлээбитэ, сэрии кэнниттэн ыарахан кэмҥэ салайбыта.  Итини учуоттаан совхоҺа «Үйэ саас тухары» диэн совхоз бочуоттаах кинигэтигэр киллэрбиттэр. 

          Кини 1933сылтан ССКП чилиэнэ этэ. Аҕа дойду Улуу сэриитигэр кыттыбытын иһин мэдээллэринэн, Ийэ дойдутугар бэриниилээхтик, үтүө суобастаахтык  үлэлээбитин иһин Саха АССР уонна РСФСР  Верховнай Советын Президиумун  грамоталарынан  наҕараадаламмыта.

        1961 сыллаахха Айбарова Мария Трофимовнаны кытта  олохторун  холбоон, ыал буолбуттара, Үөһээ Бүлүү оройуонугар Далырга олорбуттара, 5 оҕолоохтор. Оҕолоро  ийэлээх аҕаларын  үтүө аатын ааттата, үйэтитэ, кинилэр  олохторун  салҕаан, үлэлии-хамсыы сылдьаллар, бары ыаллар.

        Бүлүү музейыгар оҕолорго кэс тылбын тиэрдэбин диэн суругар маннык суруйбут: "Күндү оҕолор, бастатан туран, иитэр-үөрэтэр дьоҥҥутун- учууталларгытын ытыктыыр буолуҥ. Саҥа Конституция ыстатыйаларын ааҕаргытыгар, онно этиллибит бырааптары, көҥүллэри уонна эбээһинэстэри туһаныҥ уонна толорор иһин охсуһуҥ! "

        Василий Петрович 1980 сыллаахха  ыарахан ыарыыттан олохтон  туораабыта.

        Билигин кини олоҕун оҕолоро, элбэх сиэннэрэ, хос сиэннэрэ салгыыллар.

        Кыайыыны уҺансыбыт аҕаларынан, эьэлэринэн киэн  тутталлар, киниэхэ махтаналлар, кини  сырдык  аатыгар  сүгүрүйэллэр!