Мальтаттан Венгрияҕа диэри сатыы...

            Степан Федотович бойобуой суола Мальтаттан Венгрияҕа тиийэр. Бастаан үөрэнэн баран Илиҥҥи кыраныыссаны харабыллаабыта, танканы утары траншеялары хаспыта.

            Улахан кыргыһыыга киириитэ 1943 сыллаахха саҕаламмыта. От ыйыгар Курскай тоҕой хаан тохтуулаах сэриитигэр кыттыбыта. 15 хонуктаах быыстала суох охсуһууга бааһыран госпитальга киирбитэ. Бэйэтин чааһын 1943 сыл алтынньытыгар Белоруссияҕа тиийэн сиппитэ. Уонна өстөөҕү үүрэн Днепр өрүһү туораабыта. Онтон кинилэр чаастара төгүрүктээһиҥҥэ түбэһэр. Хас да күнү быһа немец сыабын төлө көтөөрү, элбэхтик атаакаҕа киирбиттэрэ. Биир сырыыга роталарыттан икки эрэ киһи тыыннаах ордубута. Сэтинньи 22 күнүгэр төгүрүктээһинтэн дьэ төлө көппүттэрэ. Бу кэнниттэн син өр кэмҥэ оборонаҕа турбуттара.

            Онтон 1944 сыл атырдьах ыйыгар Ясско-Кишинёвскайдааҕы операцияҕа кыттыыны ылбыта. Кыргыһыы Прут өрүс арҕаа эҥэригэр буолбута. Манна Кишинёв оройуонугар өстөөх бөдөҥ сэриитэ үлтүрүтүллүбүтэ. Молдавияны өстөөхтөн босхолоһон салгыы Румыния территориятыгар уһуннук сэриилэспитэ. Ити курдук Кыайыы-хотуу аргыстаах Венгрия сиригэр үктэммитэ. Будапешт куоракка тиийэрэ баара эрэ 50 км хаалбытын кэннэ бааһыран төннүбүтэ.