Аан дойдуну аймаабыт Аҕа дойду Улуу сэриитэ хас биирдии ыал аанын тоҥсуйан, хас биирдии киһи олоҕор ыар бэлиэни, сүтүгү хаалларбыт уоттаах сэрии… Хаһан да умнуллубат, өйөтөн-сүрэхтэн сүппэт аһыы, аба, курас санаа… Аҕа дойдуну көмүскээччилэр истэригэр Потапов аймахтан 9 киһи ыҥырыллыбытыттан 7 эдэркээн, удьуору ууһатар киһитэ сэрии толоонугар хаалбыта. Сүүһүнэн, тыһынчанан, мөлүйүөнүнэн сэбиэскэй дьон курдук красноармеец, рядовой саллаат үрдүк аатын сүгэн Ийэ дойду көмүскэлигэр тыыннарын толук уурбут аймах дьонум туһунан кэпсиэм.
Үс ини- бии Афанасий, Анемподист, Афанасий Потаповтартан улахан Афанасий уолун Василий улахан уола Потапов Василий Васильевич
Амма оройуонун Бологур нэһилиэгин «Крупская» колхоз чилиэнэ. 1943с. колхоһугар үлэлии-хамсыы сылдьан, бэбиэскэ тутан Аҕа дойдуну көмүскүүр Улуу сэриигэ ыҥырыллан барбыта, Монголияҕа Восточнай фроҥҥа тиийбитэ. 576-с аэродрому көрөр батальоҥҥа сулууспалаабыта. 1945с. дойдутугар кэлэн, колхозка, совхозка үтүө суобастаахтык үлэлээбитэ. 1980с. өлбүтэ. Наҕараадата: «За победу над Японией» медаллаах.