Анемподистов Василий Петрович 1896 с. Кыргыдай нэһилиэгэр төрөөбүтэ. Ийэтэ Анемподистова Улита Николаевна Тааһаҕар нэһилиэгиттэн төрүттээх. Аҕата Анемподистов Петр Анемподистович. Дьонун кытта Мастаах эбэ Нэлчэкэтигэр ардҕаа өтөххө олорбуттара. Дьонугар соҕотох. Уолларыгар ханыы гынаарылар дьоно таайдарыттан Тааһаҕар нэһилиэгиттэн Никифоров (Тимофеев) Прокопий Петрович диэн уолу ылан ииттибиттэр. Сэриигэ баран 1943 с. сураҕа суох сүппүтэ. Сэрии иннигэр колхозка үлэлээбит, барбах ааҕар, суруйар эбит. Кэргэнэ Иванова Нина Григорьевна, Сусанна диэн кыыс оҕолоохторо кыратыгар өлбүт.
Колхозтар тэриллиилэригэр биир бастакынан сүөһүтүн холбоон “Социализм суола” колхозка киирбитэ. Кинини кыанар киһи диэн колхоһа бэдэрээт таһыытыгар сырытыннарбыт. Бу айаҥҥа эҥкилэ суох чиэһинэй, арыгыны испэт, хаартылаабат, күүстээх, доруобай уонна кыанар дьону сүүмэрдээн ыыталлар эбит. Элбэх туркулаах таба көлөнөн таһаҕас тиэйэн күһүн сыарҕа хаара түһэн суол туруута барар уонна суол алдьаныыта төннөн кэлэр эбит. Алдаҥҥа, Бодойбоҕо, Томпоҕо тиийэ таһаҕас тиэрдэр, аҕалар эбит. Ол ыраах айаҥҥа араас моһоллору көрсөрө. Табалара да өлөллөрө, араас майгылаах дьоҥҥо да түбэһэрэ, ону барытын кини олоххо үөрүйэҕинэн, мындыр өйүнэн этэҥҥэ туораан дьиэтигэр эргиллэн кэлэрэ. Ол сындылҕаннаах айанын сырыытын туһунан бэйэтэ дьонугар кэпсиириттэн: ”Бүлүү куоратыттан мустан элбэх буолан аргыстаһан айанныыр этибит. Тиэнэн иһэр таһаҕаспытын энчирэппэккэ тиэрдиэхтээхпит, аҕалыахтаахпыт. Хонук сирдэрбитигэр түүнүн уочаратынан бэйэбит харабыллыыбыт. Оччолорго суут-сокуон кытаанах. Аара дьон тохтоон ааһар кыараҕас сибиэбийэлэригэрдэҥҥэ тиксэн хонон, үксүн балааккаҕа хонуктаан айанныыр этибит. Таҥаһы-сабы куурдар, абырахтанар усулуобуйа суох. Айаммыт былаһын тухары ыалдьыбакка, оһолломмокко этэҥҥэ эрэ сылдьыбыт киһи диэн баҕа санаалаах буоларбыт.”
Дьиэҕэ хаалбыт дьоно айаҥҥа сылдьар аҕаларын сураҕын уһун кыһыны быһа хантан да истэр кыахтара суоҕа, саас суол алдьаныыта этэҥҥэ бэйэтэ эргиллэн кэллэҕинэ биирдэ билэллэр.
Сэриигэ 1942 сыллаахха барар. Ленинград куорат оборуонатын кыттыылааҕа. 131 нүөмэрдээх 45 дивизия5а рядовой саллаатынан сылдьбыт. Сэрии бүппүтүн кэннэ биир сыл салгыы урусхалламмыт куораты чөлүгэр түһэриигэ үлэлиир. Ленинград оборуонатыгар уоттаах сэриигэ сылдьан бааһыран госпитальга киирэн эмтэммит. Саастаах нуучча дьоно аһынан бэйэлэрин аттыгар илдьэ сылдьыбыттара, онон этэҥҥэ тыыннаах дойдубар эргилинним диирэ үһү. Сэриигэ наҕараадата- үс бойобуой мэтээллэрдээх. 1946 сыл күһүн алтынньы ыйга доруобуйатынан лаппа мөлтөх туруктаах киһи дойдутугар кэлэр. Холкуоһугар сылгыһыттаабыта, бэдэрээт таһыытыгар Алданынан сылдьыбыта.
1951 сыллаахха бэрт аҕыйах оҕону дьахтары мунньан бэс күөллэрин Уолбуктаны, Бүгүйэҕи хорууга биригээдэни салайан үлэлэппитэ. Тимир курдьэҕинэн илиинэн хорбуттара. Ити күөллэр уулара түһэн элбэх оттонор ходуһа сирэ тахсан өр сылга оттоммуттара. Сылга ортотунан 200-300 туонна от оттонор буолбута.
Кэргэнэ Егорова Екатерина Петровна, Тыымпы нэһилиэгиттэн төрүттээх. Оҕолоро кыыһа Антонина аҕыс оҕолоох, уолаттара Афанасий биэс оҕолоох, Прокопий икки оҕолоох.
1956 сыллаахха 60 сааһыгар ыарахан ыарыыттан бу олохтон барбыта. Кини олоҕо ыччаттарыгар салҕанар.
