Биһиги аҕабыт,Егор Михайлович Неймохов, аҕа дойду сэриитин кыттыылааҕа баара буоллар бүгүн 95 сааһын туолуо этэ....
Аҕабыт муус устар 26 күнүгэр,1925 сыллаахха Мэҥэ Алдан нэһилиэгэр төрөөбүтэ. Аан дойдуну аймаабыт аҕа дойду сэриитэ саҕаланыытыгар кини 16 саастаах этэ,онон сэриигэ барааччыларга хапсыбакка хаалар..
Онтон 1943 сыллаахха дьэ 18 сааһын туолан бэс ыйыгар армияҕа барар.Ол баран Чита куоракка тиийэллэр,онно Япония сэриинэн түһэр буолла диэн границаны харабыллатарга доброволецтары талаллар.Олор истэригэр биһиги аҕабыт киирсэр.Онно сэтинньи ыйга дылы 47с полк автоматчигынан,салҕыы инники кирбиигэ кэтээн көрөөччүнэн, старшай прожекториһынан сылдьар.Онтон 1950 сылга дылы ытааччынан сулууспалыыр.Ол кэмнэргэ командирын кэргэнэ муусука салайааччыта Мария Шварц кинини бэлиэтии көрөн ырыаһыттар састааптарыгар киллэрэр. Манна даҕатан эттэххэ,аҕабыт үчүгэйдик ыллыыра,оччотооҕу байыаннай ырыалары барытын билэрэ...
Аҕабыт Егор Михайлович этэҥҥэ сулууспалаан 1950 сыллаахха сэттэ сыл буолан дойдутугар эргиллэр.Кэлээт Томпоҕо Рай.ВУСка начальнигынан үлэлиир, онтон Кириэс Халдьаайыга көһөн 1954 сыллаахха милицияҕа үлэлиир.Ол сылдьан олоҕун аргыһын Евдокия Андреевна Сыромятникованы көрсөн ,харахтарынан хайҕаһан,сүрэхтэринэн сөбүлэһэн ыал буолаллар.Аҕабыт 1960 сылтан ОРС "Хандыгауголь"тэрилтэҕэ пенсияҕа тахсыар дылы үтүө суобастаахтык, нэһилиэнньэ
аһын таҥаһын таһар үлэҕэ үлэлээбитэ.
Егор Михайлович майгытынан көнө, чиэһинэй,сыыһаны халтыны сирэйгэ малтаччы этэр этэ. Оҕолорун,биһигини чиэһинэй,бэрээдэктээх буоларга такайара.
Ийэбитин Евдокия Андреевналыын сэттэ оҕону иитэн үөрэтэн,бүөбэйдээн атахпытыгар туруорбуттара.Эйэлээхтик,дьоллоохтук 46 сыл бииргэ олорбуттара. Аҕабыт пенсияҕа тахсан баран сүөһү ииттэргэ санаммыта,.арыыга бэйэтэ солоон ходуһа оҥостубута.Сайын аайы онно тахсан бары оттуурбут,сынньанарбыт...
Кини айылҕаҕа сылдьарын туохтааҕар да ордороро:кустуура балыктыыра,куобахтыыра,сир астыыра.Хас куобаҕы бултаабытын,балыгы ылбытын барытын сылынан ,күнүнэн ыраас буочарынан дневникка бэлиэтээн иһэрэ. Хаһыаты,сонуну көтүппэккэ ааҕара,көрөрө, Сталины астынара,өрө тутара.Дьиэбитигэр Сталин портреттара истиэнэҕэ ыйанан турааччылар...
Сэрии ветерана Егор Михайлович,биһиги ытыктыыр аҕабыт орто дойдуга сиэрдээх олоҕу олорон 2000 сыллаахха олохтон барбыта.Кини олоҕун оҕолоро,сиэннэрэ,хос сиэннэрэ салгыыллар...
Аҕабыт,эһэбит Егор Михайлович Неймохов сырдык мөссүөнэ үйэлэргэ хаалыаҕа,сүрэхпитигэр өрүү тыыннаах сылдьыаҕа,холобур буолуоҕа.
