Биһиги аҕабыт Иван Васильевич Такыров 1930 сыллаахха Ньурба оройуонун Маалыкай нэһилиэгэр сэттэ оҕолоох ыалга төрдүс оҕоннон күн сирин көрбүтэ. Төрөөбүт сиригэр Маалыкайга үйэлээх сааһын тухары колхоз, совхоз саамай эппиэттээх ыарахан үлэтигэр биригэдьииринэн үлэлээн пенсияҕа тахсыбыта. Кини Маалыкай сэттэ кылаастаах оскуолатын бүтэрбитэ, салгыы үөрэммэтэҕэ. Аҕатыгар кынат буолан бырааттарын, балтыларын иитиһэр сыалтан колхозка үлэлээбитэ. Уоттаах сэрии сылларыгар колхоз үлэтигэр туруу үлэһит буолбута. Колхоз салалтата ханна үлэҕэ ыыппыт сиригэр, биһиги аҕабыт ол үлэни хааччыстыбалаахтык уонна кэмигэр толорор буолан, кини куруук салалта махталын ылара. Оччотооҕу кээмэйинэн аҕабыт син балачча үөрэхтээх курдук этэ. Онон да буолуо совхоз салалтата кинини бастаан хонуу биригэдьиирэ оҥорбута. Биригэдьиир үлэтэ оччотооҕу кэмҥэ сүрдээх эппиэтинэстээх этэ. Хонуу үлэтигэр үлэлиир бары колхозтаахтар күҥҥэ төһө оҥорбуттарын, киэһэ буолла да кэрийэ сылдьан көрөн-истэн, кэмнээн түмүк таһаарара.
Онон Иван Васильевич төрөөбүт дойдутуттан харыс да халбарыйбакка, колхоһа, совхоһа тэрилтэ-хаһаайыстыба быһыытынан күннэтэ сайдарыгар, колхозтаахтар уонна совхоз оробуочайдара олохторун уйгута тупсарыгар бэйэтин сэмэй кылаатын киллэрбит дьонтон биирдэстэрэ буолар.
Оччотооҕу кэм ирдэбилинэн, хас биирдии салайааччы улахан эппиэтинэһи сүгэрэ. Онон биригэдьиир киһиттэн эппиэттээн ылбыт учаастагар хас биирдии үлэһитэ үлэ дьиссипилиинэтин тутуһара, общественнай олоххо бэрээдэктээх буолара барыта ирдэниллэрэ. Ону таһынан олохтоох партийнай тэрилтэ, Совет исполкома күннэтэ ыытар үлэлэригэр актыыбынайдык кыттыһара.
Колхоз даҕаны, совхоз даҕаны эриирдээх-мускуурдаах, түһүүлээх-тахсылаах үлэтэ И.В.Такыровы биригэдьиир быһыытынан үүнэригэр, сатабыллаах салайааччы, принципиальнай коммунист буола буһан-хатан тахсарыгар көмөлөспүттэрэ.
Иван Васильевич өр сыллаах үлэтэ партиятын уонна Советскай правительствонан үрдүктүк сыаналаммыта. Аҕа дойду уодаһыннаах, уһун унньуктаах сэриитин кэмигэр таһаарыылаах үлэтэ «За доблестный труд в ВОВ 1941-1945 гг», «Ветеран труда» диэн медалларынан, онтон кэлин өссө 4 медалынан, маны таһынан «Отличник социалистического соревнования сельского хозяйства РСФСР» диэн знагынан наҕараадалламыта, Бордоҥ нэһилиэгин бочуоттаах олохтооҕо.
Иван Васильевич дьиэ кэргэнэ оччоттон баччаҕа диэри Маалыкай бөһүөлэгин дьоһуннаах ыалларыттан биирдэстэрэ буолан, дьон-сэргэ ытактабылын ылан олороллор. Кини кэргэнэ- биһиги ийэбит Мария Ивановна Габышевалыын сэттэ оҕону төрөтөн, көрөн-харайан, киһи-хара оҥортоон, үөрэхтэтэлээн, олох киэн аартыгар үктэннэрбиттэрэ. Бары талбыт идэлэринэн үлэлииллэр, Дьокууйкай, Бүлүү куораттарга, Маалыкайга олороллор. Бары ыаллар, оҕолордоохтор, сиэннэрдээхтэр.
