Эһэбит Платонов Василий Семенович, норуокка биллэринэн Баһыччаан , II Наахара нэһилиэгэр дьадаҥы бааһынай кэргэнигэр төрөөбүт. Аҕата Платонов Семен Николаевич (Сэмэҥкэ), ийэтэ Табаҕаттан төрүттээх Платонова (Керемясова ) Акулина Петровна. Аҕата Сэмэҥкэ тарбаҕар талааннаах уус эбитэ үһү. Тимиринэн да, маһынан да уһанара. Оҥорбут оҕо олоппоһун билигин да сиэттэрэ туһаналлар. Эһэбит Баһылайдаах бииргэ төрөөбүт ахсыалар этэ. Онтон кини соҕотох уол оҕо эбит. Кыайан үөрэммэтэх. Кыра эрдэҕиттэн хара үлэҕэ үлэлээбит. Бүтэйдээхтэн төрүттээх Стручкова Наталья Никифоровнаны кэргэн ылбыт. 1931 сыллаахха кэргэнинээн “Күөдүй” холкуоска чилиэнинэн киирбиттэр. Биэс оҕоломмуттара. 1942 сыллаахха иккис хомуурга ыҥырыллан армияҕа барбыта. Забайкальскай байыаннай уокурукка ат депотугар сулууспалаабыта. Япония империалистарын утары сэриигэ илдьээри бэлэмнии сырыттахтарына: “Сэрии бүттэ, Япония бэриннэ,-” диэн буолбут. 1945 с. төрөөбүт дойдутугар эргиллибитэ. “Японияны кыайыы иһин”, “Аҕа дойду Улуу сэриитин сылларыгар килбиэннээх үлэтин иһин” уонна элбэх юбилейнай мэтээллэринэн наҕараадаламмыта. Сэрииттэн эргиллэн баран сылгыһытынан пенсияҕа тахсыар диэри үлэлээбитэ. Үлэтэ түмүктээх этэ, убаһанан бириэмийэлэнэрэ. Икки төгүл Ааллаах Үүҥҥэ таһаҕас таһыытыгар сылдьыбыта. Эһэбит холхуоһунай тутуу бэтэрээнэ, ударниктар слеттарын кыттыылааҕа, стахановец этэ. Үлэтин быыһыгар бултуурун сөбүлүүрэ. Кустуура, андылыыра, балыктыыра. Кыһынын кырынаастыыра, солоҥдолуура, куобахтыыра. 1952 с. пенсияҕа тахсан баран, Наахара орто оскуолатыгар рабочайдаабыта, харабыллаабыта. Онно үчүгэйдик үлэлээн элбэх махтал суруктардаах. Сайынын “Арҕаа үрэх” звенотугар окко үлэлиирэ. Наахараҕа “Халдьаайыга” өтөхтөөхтөрө. Сайын аайы сиэттэр кэлэн сайылыырбыт. Ынахтардаах, кууруссалардаах буолан өрүү сибиэһэй аһынан аһыырбыт. Эбэбит балаҕаҥҥа оһоххо буһарбыт килиэбэ минньигэс да буолара. Тэлгэһэҕэ оҕо бөҕө мустан оонньуурбут. Кырдьар саастарыгар улахан кыыстарыгар Елена Васильевнаҕа уонна күтүөттэригэр Василий Давыдовичка көрүллүбүттэрэ. Биһиги, сиэттэрэ, эһэбит, эбэбит бэлэхтээбит оҕо сааспыт кэрэ кэмнэрин умнубаппыт, өрүү өйдүү-саныы сылдьабыт.
Суруйда сиэнэ Н.В.Пахомова.
