(1909-1996)

Шестаков М. П. - I Мэҥэ-Хаҥалас улууһугар Бастакы Холгума нэһилиэгэр төрөөбүт. Аҕата – Ефимов Петр Константинович, ийэтэ – Гоголева Татьяна Лазаревна. Кинилэр 8 оҕолоохтор эбит. Михаил алтыс оҕонон төрөөбүт. Кинини кыра эрдэҕинэ хаан аймахтара Шестаков Петр Дмитриевич-Бүөччээн уонна Романова Февронья Васильевна-Хобороос бэйэлэригэр ылан иитэллэр, араспаанньаларын биэрэллэр.

Михаил Петрович бэс ыйыгар 1942 с. Кыһыл Аармыйа кэккэтигэр ыҥырыллан барбыт. Уралга Молотов куорат таһыгар баар Юг станцияҕа стрелковай дивизияҕа бэлэмнээн баран, хайыһар батальонугар ыыталлар. Ити кэннэ Ленинградскай фроҥҥа киирэн, сэриигэ барар. 1943 с. сааһыгар 486-с стрелковай полкаҕа автоматнай рота тэриллэн, онно киирэн, Ленинград таһыгар баар Медунцы станцияны босхолуурга кыттар, бааһырар. Госпиталь кэнниттэн связной-ординарец буолар, Волхов станцияны босхолуурга сэриилэһэр. Снаряд аттыгар эстэн, атаҕар улаханнык эчэйэр. Госпитальга сытан, иккис группалаах инбэлиит буолан, “Красный Октябрь” собуокка рабочайынан үлэҕэ ыыталлар. 1945 с. кыһын дойдутугар эргиллэр. Бииргэ төрөөбүттэрэ - Николай, Дмитрий уонна Игнатий уоттаах сэриигэ былдьаммыттара.

Шестаков М. П. - I Аҕа Дойду Улуу сэриитин II степэннээх орден кавалера, “Германияны кыайыы иһин”, “Аҕа Дойду Улуу сэриитин 1941-1945 сс. килбиэннээх үлэтин иһин” мэтээллэрдээх, Коммунистическэй үлэ ударнига, Карл Байкалов аатынан бириэмийэ лауреата. Элбэх оҕолоох, сиэннэрдээх, хос сиэннэрдээх. Олорор нэһилиэгэр тутууга үлэлээбитэ. Сэриигэ ылбыт бааһыттан сылтаан, өр кэмҥэ ыалдьан эрэйдэммитэ.

 Суруйда уола Н. М. Шестаков, Нам с., 16.05.2020.