Ердашев Евдоким Маркович - Аҕа дойду сэриитин кыттыылаа5а. Кини 1926 сыллаахха төрөөбүтэ. Төрөөбүт сирэ Үөhээ Бүлүү оройуонун Дүллүкүтэ. Аҕата- Дьардаас уола Марк. Ийэтэ - Ксенофонтова Маайа. Евдоким Маркович 4 кылаас үөрэхтээх. Уон  аҕыс саастааҕар сэриигэ барбыт.Кини илин Забайкальскай байыаннай чааска тубэhэн, Монголияҕа тиийэн 25-с механизированнай отдельнай бригада диэҥҥэ сулууспалаабыт. Онно сахалар элбэхтэрэ үhү.Евдоким  3-с батальоҥҥа  минометчигынан   сулууспалаабыт. Югозаркит диэн улахан дэриэбинэҕэ Монголия бэйэтин чаастара, Сэбиэскэй байыаннай чаастар турбуттар. Манна 1,5 сыл сулууспалаабыт. Бииргэ сулууспалаабыт взвод солбуйааччы командирын, Подолицин Борис Николаевич диэн нуучча киhитин олус учугэйдик ахтара. Кини миигин бэйэтин оҕотун курдук үөрэтэн-такайан илдьэ сылдьыбыта диир.

25-с механизированнай отдельнай биригээдэ командира подполковник Попов, Монголияҕа турар Сэбиэскэй, Монгольскай атынан сэриилэр Холбоһуктаах Армияларын генерал полковник Плиев хамаандалаан Япония Квантунскай Армиятын утары сэриигэ киллэрбиттэр. Сэриигэ киириэхтэрин иннинэ митинг ыыппыттар. Ол кэннэ границаны туораан Монголияҕа киирии буолбут. Маннай Далайнар куоракка тиийбиттэр. Аара танкалар, массыыналар уматыктара бутэн Монголия кумаҕар  чаардаабыттар. Онтон таанкалары испииринэн заправкалааннар ол кыhaлҕалаах кумахтан арахпыттар. Далайнар куораты ааhан Хинган хайатын бэрт эрэйинэн туораан Жехэ куоракка тиийбиттэр. Генерал полковник Плиев командатынан куорат кириэппэһигэр баар япон сэриилэрин улахан кыргыhыыта суох бэринэргэ күhэйтээбиттэр. Дьоппуон саллааттарын барыларын билиэн ылаттаабыттар. Билиэннэйдэри тута Сэбиэскэй Сойууска ыыталаабыттар.

Жехэ куоракка Евдоким Маркович 1946 сыл тохсунньу 12 кунугэр дылы сулууспалаабыт. Дьоппуоннар иитэлээн кээспит миналарын булан суох оҥоруу, куоракка бэрээдэги олохтооhун кинилэр эбээhинэстэрэ буолбут. 3 тогул баандалар  өрө тура сылдьыбыттарын хам баттаабыттар.

Биирдэ Евдоким Маркович дьоппуон офицердара  олоро сылдьыбыт уопсайдарыттан олус учугэй оҥоhуулаах саабыла булан ылбыт. Булумньубун дойдубар илдьэн музейга туттарыам диэн санаабыт. Онтун бэйэтин офицера кэлэн: «Не положено!» - диэн бэйэтигэр ылан барбыт.

1946 сыл тохсунньу 12 кунугэр граница5а баар. Соловьевскай станцияҕа турар полкаҕа холбообуттар. Онно 1950 сыл ыам ыйыгар дылы сулуспалаабыт. Дойдутугар кэлэн баран эһэбит Евдоким Маркович Үөhээ Бүлүүгэ налоговай агенынан, Бүлүүгэ тутуу тэрилтэлэригэр плотнигынан, бригадирынан, «Мастаах» совхозка электригинэн 15 сыл үлэлээн баран пенсияҕа олорбута. 2012 олохтон ыалдьан туораабыта. Биһиги дьиэ кэргэн эһэбитинэн киэн туттабыт.

Суруйда Светлана Сергеевна Иванова, Бүлүү к.,

П.Х.Староватов аатынан Бүлүүтээҕи кыраайы үөрэтэр музей үлэһитэ.