Биир дойдулаахпыт, сэрии кыттыылааҕа ДМИТРИЕВ АФАНАСИЙ ИВАНОВИЧ 1926 сыллаахха Тылгыны нэһилиэгэр элбэх оҕолоох Дмитриев Уйбаан (Утукуй) оҕонньор дьиэ кэргэнигэр төрөөбүтэ. Начаалынай оскуоланы бүтэрэн баран колхозка араас үлэҕэ үлэлээбитэ. 18 сааһын туолаат, 1944 сыл бэс ыйын 27 күнүгэр армияҕа ыҥырыллыбыта. Армияҕа баран ис ыарыытыгар ыалдьан уһуннук госпитальга сытан эмтэнэн баран дойдутугар төннөн кэлбитэ. Дойдутугар кэлэн колхозка үлэлээбитинэн барбыта. Федотова Ольганы кэргэн ылан икки оҕоломмуттара. Кэргэнин кыыһа Ира Бүлүү училищетын бүтэрэн, учууталлыы сылдьан быарынан ыалдьан өлбүтэ. Уола Ваня оскуолаҕа үөрэнэ сылдьан бүөрүнэн ыалдьан өлбүтэ. Кыра кыыһа Марфа олоҕун доҕоро Алексей Владимировичтыын 42 сыл бииргэ олордулар, 3 оҕолоохтор, 5 сиэннээхтэр. Кыргыттар - медиктэр, уол - тренер, Россия спордун маастара. Марфа Афанасьевна САССР Верховнай Советын депутатынан норуотунан талыллан үтүө суобастаахтык 1985-1990  сылларга үлэлээбитэ. Аҕалара Афанасий Иванович 1946 сыл тохсунньутугар дойдутугар кэлиэҕиттэн колхозка кыайыгас-хотугас бастыҥ үлэһит буолан хайҕалга сылдьыбыта. Кэлин "Мастаах", "Күүлэт" совхозка Тылгыны отделениетыгар ферма учаастагар дьиэ кэргэнинээн олорон идэтийэн үлэлээбиттэрэ. Ольга бастыҥ доярка, Афанасий ферма араас ис-тас үлэтигэр үлэлээбитэ. Үтүө суобастаах үлэһит ыал этилэр. Кини 1976 сыллаахха оһоллонон олохтон туораабыта. Кини ситэ олорботоҕун ыччаттара салгыыллар, ситэрэллэр. Сэрии кыттыылааҕа, биир дойдулаахпыт Дмитриев А.И. аата дойдутугар умнуллубат.