Тылгыны төрүт олохтооҕо, сэрии бэтэрээнэ, буойун МАТВЕЕВ ВАСИЛИЙ ПЕТРОВИЧ - Бүөтүр Баһылайа 1907 сыллаахха төрөөбүтэ. Кини - элбэх оҕолоох Хоохот Бүөтүрүн улахан уола. Кыра эрдэҕиттэн үлэҕэ буһан-хатан хоһуун үлэһит киһи буола улааппыта. Өлөөнүнэн, Сааскылааҕынан, Дьэһиэйгэ тиийэ айан бөҕөнү айаннаабыта. Аҕа Дойду сэриитигэр кинини, 40-чатыгар чугаһаабыт киһини, 1944 сыл от ыйыгар ыҥырбыттара. Кини 1945 сыл ыам ыйыгар дылы маршал И.С. Конев хамаандалыыр 1 Украинскай фронун 67-с стрелковой полкатыгар, онтон атырдьах ыйыгар дылы 877-с, салгыы алтынньыга дылы 114-с стрелковой полкаҕа сулууспалаабыт. Кинини инники кирбиигэ сэриилэһэр саллааттар астарын таһыыга анаабыттар. Буулдьа, снаряд эстиитин ортотунан сорудаҕын толоро уксун сыыллан, саллааттар барахсаттарга астарын тиһигин быспакка тиэрдэр эбит. 1945 сыл муус устарга Берлин чугаһыгар кыргыһыыга аттыгар снаряд эстэн, кулгааҕа кыа-хаан буолан, улаханнык контузияламмытын санитардар таһааран госпитальга эмтээбиттэрэ. Баһылай сэрииттэн дойдутугар икки мэтээллээх, И.В. Сталинтан махтал суруктаах эргиллэн кэлбитэ. Элбэх оҕолоох ыал аҕата сэрииттэн дьонугар, төрөөбүт дойдутугар тыыннаах эргиллэн кэлбитэ - улахан дьол этэ. Кини айылҕаттан аҕыйах саҥалаах буолан, сэриигэ сылдьыбытын кэпсээбэт этэ. Уоттаах сэриигэ сылдьыбыт бэтэрээннэр бары да сэрии кэмин ахтыбат, умна сатыыр этилэр. Баһылай дойдутугар холкуоска кылгас кэмҥэ биригэдьиирдээбитэ, фермаҕа сэбиэдиссэйдээбитэ. Онтон үйэтин тухары холкуоһун араас үлэлэригэр, уксун табанан Булуу куоратыттан бэдэрээт таһыытыгар үлэлээбитэ. Баһылай маһынан даҕаны, тимиринэн даҕаны уһанар дэгиттэр талааннаах уус киһи этэ. Дойдутугар элбэх ыал дьиэтин аанын, түннүктэрин оҥорон, дьон махталын ылбыта. Тыы, тимир оһох, комод, иһит ыскааба кини илиититтэн оҥоһуллан тахсаллара, быһах охсуута эмиэ кини дьарыга этэ. Кэлин, ыарытыйан баран, жилканан өрүс балыгар уонна собоҕо илим баайар идэлэммитэ. Олоҕун доҕорун Матвеева (Кононова) Анна Герасимовнаны кытта 11 оҕоломмуттарыттан түөрт оҕо олохтон туораабыттара. Кэнники 6 уол, 1 кыыс оҕолоро улаатан, бары үөрэнэн, оҕо-уруу тэнитэн, эһэлээх эбэлэрин ааттарын ааттата сылдьаллар.