Биир дойдулаахпыт, буойун ЗАХАРОВ ИВАН ВАСИЛЬЕВИЧ 1919 сыллаахха Тылгыныга төрөөбүтэ. Бүлүү педучилищетын бүтэрэн баран, Мастаахха учууталлаабыта. Сэриигэ пулеметчигынан сылдьан сэриилэспит. Керчь куорат аттыгар бааһыран, төбөтүгэр снаряд оскуолактаах эргиллэн кэлбитэ. Тылгыны, Үгүлээт оскуолаларыгар математика учууталынан үлэлээбитэ. Кэтэхтэн үөрэнэн Якутскайдааҕы пединституту бүтэрбитэ. Сэрииттэн кэлэн баран Кононова Александра Петровнаны (1924-1973) кэргэн ылан ыал буолбуттара. Иван Васильевич 1956 сыллаахха Үгүлээккэ учууталлыы сылдьан, передвижной мотору үлэлэтээри оскуола иһиттэн таһырдьа таһааран иһэн халтарыйан кирилиэскэ охсуллан төбөтүгэр баар оскуолага мэйиитигэр киирэн эмискэ өлбүтэ. Уҥуоҕа Тылгыныга дэриэбинэ кылабыыһатыгар баар. Кини 4 оҕолоох этэ. Толя диэн уола 7, Алик - 25 саастарыгар ыалдьан өлбүттэрэ. Улахан кыыһа Светлана Ивановна Тыымпыга учууталлаабыта, үрдүк үөрэхтээх. Кини кэргэнэ Еремеев Степан Степанович Орто Бүлүү совхозка кылаабынай инженеринэн үлэлээбитэ. Кыыстара Күннэй Степановна Санкт-Петербурдааҕы экономическэй институту бүтэрбитэ. Улуустааҕы финансовай-казначейскай управлениеҕа начаалынньыгынан үлэлээбитэ. Кыра кыыһа Людмила Ивановна, Хампаҕа "Орто Бүлүү" сельпоҕа кылаабынай бухгалтеринэн үлэлээбитэ. Кини кэргэнэ Павлов Валерий Николаевич Лүксүгүн нэһилиэгиттэн төрүттээх, Арыылаах алминистрациятын баһылыгынан, индом директорынан үлэлээбитэ. Ыалдьан үлэтиттэн тохтообута. Кинилэр биэс оҕолоохтор, үс сиэннээхтэр. Кыыстара Александра Валерьевна үрдүк үөрэхтээх оҕо саадын үлэһитэ. Уоллара Николай Валерьевич Москваҕа эргиэн үөрэҕин үрдүгү бүтэрбитэ. Кэргэннээх, үс оҕолоох. Бу маннык ахтыыны буойун быраата Захаров Христофор Васильевич кинигэҕэ суруйан хаалларбытын туһанныбыт. Тылгыны олохтооҕо, буойун учуутал Захаров Иван Васильевич үтүө аатын дойдутун дьоно саныыбыт, умнубаппыт.