Романов Игнатий Григорьевич 

(1920-1983)

        Биһиги аҕабыт Романов Игнатий Григорьевич, сэрии бэтэрээнэ, Баатаҕай нэһилиэгэр 1920 сыллаахха төрөөбүтэ. Чараҥай сэттэ кылаастаах оскуолатын бүтэрэн, Дьокуускайга реальнай училищеҕа үөрэнэ киирбитэ. 1941 сыллаахха сэрии саҕаламмытыгар бэбиэскэ тутан, уоттаах сэриигэ барбыта. Онно баран күүстээх буомбалааһыҥҥа түбэһэн, улахан контузия ылан, госпитальга эмтэнэн, доруобуйатынан сыыйыллан төннүбүтэ. Дойдутугар Бороҕоҥҥо төннөн кэлэн, НКВД-га силиэдэбэтэл курсун  бүтэрэн, үлэтин саҕалаабыта.

        Бу сэрии кэмигэр ыарахан үлэ этэ диэн кэпсиирэ. Туох да буруйа суох дьону, ким аччыктаан ылан, ким кутуйах хасааһын булан бурдук уоран сиэбит диэн, норуот өстөөҕө аатыран, хаайыыга быраҕаллара, сууттаан хаатырҕаҕа ыыталлара. Онно үлэлии сылдьан биһиги ийэбит – Тарская Екатерина Дмитриевнаны кэргэн ылбыта. Ийэм ол кэмҥэ саахсаҕа сэбиэдиссэйинэн үлэлиир эбит, ыал буолан 7 оҕоломмуттара.

        Аҕабыт Игнатий Григорьевич кэлин Лесхозка өр сылларга леснигынан үтүө суобастаахтык үлэлээбитэ. Үчүгэй  үлэтин иһин элбэх бочуотунай грамотанан, сыаналаах бэлэхтэринэн наҕараадаламмыта. Биир дойдулаахтара аҕабытын үтүө майгытын иһин убаастыыллара. Кини сокуону билэрин иһин, сүбэлэтэ кэлэллэр этэ. Дьоҥҥо элэккэй, үтүө майгылаах этэ. Аҕабыт билигин 20 сиэннээх, 23 хос сиэннээх.

Ахтыыны суруйда кыыһа, Гурьева Мария Игнатьевна.