1921 с. Алтынньы 9 күнүгэр Бээрийэ нэһилиэгэр “Холлоҕостоох” диэн сиргэ дьадаҥы бааһынай бааһынай кэргэнигэр төрөөбүтэ. 1933 с. Дьонун кытта “Тыраҕатталаах” холхуоска киирбиттэрэ. 1931-1934 сс. Танда орто оскуолатын 4-с кылааһын бүтэрбитэ. Үөрэҕин кэнниттэн холхуос үлэтигэр сэриигэ барыар диэри үлэлээбитэ.
Михаил Охлопков Кыһыл Армия кэккэтигэр 1942 с. бэс ыйын 7 күнүгэр Дьокуускай горвоенкоматынан ыҥырыллыбыта. 1942 с. От ыйын 4 күнүгэр Челябинскай куоракка тиийэн байыаннай үөрэххэ үөрэммитэ. 16-с хайыһар биригээдэтин састаабыгар киирэн, бастакы бойобуой сүрэхтэниитин Соҕурууҥҥу фроҥҥа Ростов-на-Дону арҕаа өттүгэр Матвеев Курган анныгар ылан чэпчэкитик бааһырбыта. Госпиталь кэнниттэн 87 стрелковай дивизия 264 стрелковай полктарыгар байыаннай үөрэҕи барбыта. Атырдьах ыйын ортотун диэки Донбаһы босхолуур иһин 4-с Украинскай фронт кимэн киириитэ саҕаламмыта. Охлопков полката Сталино, Болномаха, Большой Токмак куораттары босхолуур иһин кырыктаах кыргыһыыларга кыттыбыта. Бу кыргыһыыларга бааһыран Охлопков Сталино куорат госпиталыгар эмтэнэ атаарыллыбыта.
Үтүөрбүт байыаһы 19 гвардейскай танковай корпус 202 красноармейскай танковай бригадатыгар анаабыттара. 1944 с. муус устарга бу чаас 4-с Украинскай фронт састаабыгар Сиваһы туораан Крымы босхолооһуҥҥа кыттыбыта. Биһиги чаастарбыт Джанкой, Симферополь, Бахчисарай, Севастополь куораттары босхолооту. 1944 с. Бэс ыйыгар Охлопков чааһа Тула куоракка тиийэн салгыы байыаннай бэлэмнэниини барбыта. Онтон салгыы I Прибалтийскай фронт састаабыгар Литовскай ССР Поневежеск куорат анныгар салгыы сэриигэ киирбитэ. 1944 с. атырдьах ыйыгар үгүс хаан тохтуулаах кыргыһыылар түмүктэригэр Биржай, Шауляй, Добеле куораттар босхоломмуттара.
Салгыы кимэн киирии бириэмэтигэр М. Охлопков мина иитэ сылдьан билиэн түбэһэр. Хорсун байыас тохсунньу 21 күнэ буолар түүнүгэр 4 буолан Клайпеда концлагерыттан өстөөх билиэниттэн куоппуттара. Стройга эргиллээт, М. Охлопков 257 Краснознаменнай дивизия 948 Краснознаменнай стрелковай полкаҕа взвод полковай разведкатыгар ылыллан элбэхтэ өстөөх тыылыгар “тыл” ыла сылдьыбыта. Онтон снайперскай группа старшайынан ананан сэрии бүтүөр диэри сылдьыбыта. Кыаыыны Михаил Охлопков Либава куорат анныгар көрсүбүтэ.
М.Н. Охлопков 1946 с. ыам ыйын 14 күнүгэр демобилизайияланан дойдутугар этэҥҥэ эргиллибитэ. Кини хорсун быһыыта Аҕа дойду сэриитин I степеннаах, “За отвагу”, “Германияны Кыайыы иһин” медалларынан бэлиэтэммитэ.
1946 с.пенсияҕа барыар диэри Герой Егоров аатынан колхозка, совхозка суоппардаабыта. Үлэҕэ ситиһиилэрин иһин Үлэ Кыһыл Знамята уордьанынан, “Ленин төрөөбүтэ 100 сыла туолуутунан” мэтээлинэн, “Килбиэннээх үлэтин иһин” мэтээлинэн, элбэх грамоталарынан наҕараадаламмыта. Байаҕантай нэһилиэгин Сэбиэтиг хас да ыҥырыылаах дьокутаатынан, Уус Алдан народнай суутун сэтээтэлинэн, Революционнай бойобуой, Үлэ Албан аатын чилиэнинэн үлэлээбитэ. Байаҕантай нэһилиэгин, Уус Алдан улууһун Бочуоттаах олохтооҕо.
8 оҕолоох, 26 сиэннээх, 20-чэ хос сиэннэх.
