Ольга Петровна 4-с оҕото, Афанасий Петрович бастакы уол оҕо буолан кыра сааьыттан үлэлии үөрэммит. Түөрт кылаас үөрэхтээх. Чулуу булчут этэ. Сэриигэ Алданнааҕы ОБК 01.06.1943 сыллаахха ыҥырыллан, техническэй батальон 410-с отделениетыгар сулууспалаабыта. Япония сэриитин кыттыылааҕа. Полевой почтатын номера № 32803.
1948 сылга муус устар 2 күнүгэр дойдутугар этэҥҥэ эргиллэн кэлбитэ. «Японияны кыайыы иһин» мэтээллээх. 1949 с. Федорова (Максимова) Ирина Романовнаны, (1924-2007) кэргэн ылан, ыал буолбуттара. Афанасий Петрович холкуоска сайынын хортуоппуй үүннэриитигэр үлэлиирэ, кыһынын тыаҕа бултуура. Нэһилиэнньэни хортуоппуйунан, этинэн уонна түүлээҕинэн хааччыйара. 1960 сыллаахха от ыйын 6 күнүгэр эдэр сааһыгар, баара суоҕа 36 эрэ сааһыгар ыарахан ыарыыттан күн сириттэн барбыта.
Кэргэнэ Ирина Романовна холкуоска Лээгигэ, кэлин көһөрүү кэнниттэн «Амма» сопхуос Чакырдааҕы отделениетыгар пенсияҕа тахсыар диэри ыанньыксытынан үлэлээбитэ. «Аҕа дойдуну көмүскүүр Улуу сэрии 1941-1945 сс. килбиэннээх үлэтин иһин», элбэх оҕолооҕун иһин хас да ийэ буолуу уонна да атын үбүлүөйдээх мэтээллэринэн наҕараадаламмыта. Үлэ, тыыл бэтэрээнэ.
Афанасий Петрович Ирина Романовналыын 11 сыл бииргэ олорон, 6 оҕоломмуттара, билигин элбэх сиэннэр, хос сиэннэр кинилэр ааттарын ааттаталлар.
Оҕолоро:
Мария Афанасьевна (11.07.1949-30.05.1997), Амма-Наахараҕа зверофермаҕа 1970-1975 сылларга биригэдьииринэн үлэлээбитэ. Онтон кэргэнин Таатта оройуонун Харбалаах, Чөркөөх нэһилиэктэригэр бырааһынан анаабыттарыгар 1975с. көһөн барбыттара. Сопхуоска зоотехниктаабыта, биригэдьиирдээбитэ, кэнники сылларга, олоҕун тиһэх күнүгэр диэри үүт куухуньатыгар сэбиэдиссэйинэн үлэлээбитэ. Кэргэнэ Николаев Николай Тихонович, врач. 4 оҕоломмуттара, Эдуард, Николай, Сахаяна, Тихон, 6 сиэннээхтэр, хос сиэннээхтэр.
Клавдия Афанасьевна (22.01.1952-16.11.2016). 1973 с. Төҥүлүтээҕи СПТУ продавец идэтин баһылаан Чакыр маҕаһыыныгар атыыһыттаабыта. Онтон Амма сопхуос Чакырдааҕы отделениетыгар үлэлээбитэ. Кэргэнэ Федоров Николай Павлович, Дьокуускайдааҕы культпросвет училищены бүтэрэн, Уус Алдан, Амма оройуоннарынан кулууп дириэктэринэн үлэлээбит. 4 оҕолоохтор: Любовь, Павел, Игорь, Розалия. 11 сиэннээхтэр, 3 хос сиэннээх.
Петр Афанасьевич (02.07.1956), кэргэнэ Розалия Дмитриевна, 3 оҕолоохтор: Наталья, Дария, Петр. Оҕолор бары үрдүк үөрэхтээхтэр, 7 сиэннээхтэр.
Раиса Афанасьевна 12.04.1958, ветеринарнай фельдшер үөрэхтээх, өр кэмҥэ детсад иитээччитинэн үлэлээбитэ. Педагогическай үлэ ветерана. Кэргэнэ Тарскай Николай Николаевич. Уус Алдан улууһун Түүлээх нэһилиэгэр олохсуйаллар. 3 оҕолоохтор, 2 аймахтарын оҕотун иитэн улаатыннардылар.
Розалия Афанасьевна 08.12.1961, бухгалтер үөрэхтээх, Чакыр нэһилиэгэр бухгалтерынан үлэлээбитэ. Кэргэнэ Осипов Степан Петрович, өр сылларга Амма сопхуоска, онтон «Амма суол» тэрилтэтигэр үлэлээбитэ. 5 оҕолоохтор: Степан, Надежда, Ирина, Мотрена, Алена. Бары үрдук үөрэхтээхтэр, үлэһиттэр.
Афанасий Афанасьевич 17.05.1965, кэргэнэ Лобанова Мотрена Васильевна, иккиэн Амма сопхуоска үлэлээбиттэрэ, 5 оҕолоохтор, 7 сиэннээхтэр.
