Эһээбит Михаил Ефимович  1925 сыллахха Амма улууһун Эмис нэһилиэгэр төрөөбүтэ. Сэрии бастакы сылларыгар сут-кураан сатыылаан ииппит ийэллээх аҕата хоргуйан өлбүттэр. Кинини сэбиэт бэрэссэдээтэлэ П.Ф. Новиков-Бытыгынай сааьын эбэн суруйан, Дьокуускайга ФЗО оскуолатыгар уөрэттэрэ ыытан, хоргуйан өлүүттэн быһаабыт. Эһээбит 18 сааһын туолаат, тылланан, 1943 сыллаахха фронна барбыт. Байыаннай үөрэҕи бүтэрэн 3 Украинскай фронт саллаата буолан, Болгарияны, Венгрияны босхолоспут, Кыайыы күнүн Австрияҕа көрсүбүт. Будапешт куораты 17 суукканы быһа сэриилэһэн, босхолообуттар. Бу кыргыыһыга “Хорсунун иһин”, “Будапеһы ылыы иһин” мэтээллэрнэн наҕараадаламмыт. Дунай өрус арҕаа биэрэгинээҕи бөҕөргөтүүнү туруулаһыыга хорсун быһыыьын иһин, 3 Украинскай фронт командующайа Маршал Толбухин махтал суругунан бэлиэтэммит.

Кыайыы кэнниттэн 3 сыл устата Арҕаа Украинаны бандеровецтартан ыраастааһыҥҥа сулууспалаабыт.  Кини дойдутугар Эмис нэһилиэгэр 1948 сылаахха кулун тутарга этэҥҥэ эргиллэн кэлбитэ. 1951 сылаахха суоппар кууруһугар үөрэнэн, 1953 сыллахха нэһилиэгэр маҥнайгы массыынаны сүүрдүбүт. Эһээбит төрөөбүт нэһилиэгэр суоппарынан 1981 сыллахха бочуоттаах сынньалаҥҥа барыар диэри таһаарыылаахтык үлэлээбитэ. Илдьэ сылдьар массыынатын мэлдьи көрүнэр, оҥосто сылдьар буолан, үлэтэ таһаарыылаах, үтүө түмүктээх буолара. Ол да иһин дьоно-сэргэтэ ытыктаан Суоппар Миисэ диэн ааттыыллара. Эһээбит холкуос бырабылыанньатын чилиэнэ, ылыннарыылаах тыллаах-өстөөх, төрөөбүт нэһилиэгин патриота, уопсастыбанньыга, элбэх эдэр механизаторга настаабынньык, үтүө сүбэһит этэ.

Эбээбитин кытары Анна Ивановналыын анаабыт курдук 5 уолу, 5 кыыһы иитэн-үөрэттэрэн, атахтарыгар туруорбуттара.Билигин кинилэр олохторун оҕолоро, сиэннэрэ,хос сиэннэрэ салгыыбыт. Олох уустук өрүттэрин кинилэр хайдах быһаарыа, оҥоруо этилэр диэн олох өлбөөдүйбэт сулуһа оностон, кинилэргэ тэнҥэһэ сатыыбыт.