Аким Дмитриевич Мэҥэ Хаҥаласка Бүтэйдээх оскуолатын 6 кылааһын бүтэрбитэ. Оскуола кэнниттэн Табаҕаҕа балтараа сыл кэриҥэ кладовщиктаабыт уонна кэлин сэриигэ барыар диэри бригадирынан үлэлээбит. Сэрии иннинэ Елена Васильевна Старостинаны кэргэн ылан баара-суоҕа икки аҥаар сыл бииргэ олорбуттар. Кинилэр Лидия диэн кыыстаммыттара. Ийэм Лидия Акимовна (Слепцова) Макарова (1941-1993) аҕабынаан Павел Павлович Макаровтыын Чурапчы нэһилиэгэр “Сельхозтехникаҕа” үлэлээн, тыа хаһаайыстыбатын үлэһитин үтүөлээх аатын ыланнар, үс оҕолонон, оҕолорун үрдүк үөрэхтээн, сиэннэрдэнэн, дьоһун ыал буолан олорон ааспыттара.

А.Д. Слепцов Эһэм 1941 с. иккис барыыга атырдьах ыйын 26 к. ЧХОБ-н ыҥырыллан рядовойунан сэриигэ барбыт. Кини кулун тутар ыйга дылы сурук суруйбут, онтон бэстилиэнэй суругар «Бүгүн барар буоллум, ханна да барарым биллибэт, тиийэр сирбэр тиийдэхпинэ суруйуом…». Бу кэнниттэн туох да биллибэтэх. Ол кэнниттэн сураҕа суох сүттэ диэн 1942 с. муус устар ыйга биллэрии кэлбит. Архив материалыттан ылан көрдөххө Аким Дмитриевич Табаҕаттан ыҥырыллан барбыт. Онно сурулларынан: «1231-с сп, 06.04.1942 г., умер от ран. Ржев, Степакино. (ОБД д. именные списки умерших 28.01.42 -04.09.43 г. стр.17 258 ОМСБ 250 сд), перезахоронен из Степакино Ржевский район сп Победа в Парахинский территориальный участок д. Ефимово. Воинское захоронение 69-492/ 2014 стр. 26).