Егор Дмитриевич Тараҕай нэһилиэгэр төрөөбүтэ. Армияҕа барыан иннинэ колхозка ыанньыксытынан үлэлээбитэ. 1941 сыллаахха кыһыны быһа Ааллаах Үүнҥэ таһаҕас таһыспыт. 1943 с. 23 саастааҕар бэс ыйын саҥатыгар армияҕа ыҥырыллан Ийэ дойдутун көмүскүү барбыт.
Бастаан Бурят-Монголияҕа баар Усть-Кяхта диэн сиргэ 20-с коннай депоҕа байыаһынан 1944 сыл ахсынньы ый 28 күнүгэр дылы сулуспалаан баран Илин Дацаҥҥа, онтон Орловскай уобалас Людиново диэн станциятыгар баар байыаннай чаастарга переформированиеҕа сылдьан баран, 1944 с. олунньу ый саҥатыгар Новгород таһыттан 311-с стрелковай полк састаабыгар киирсэн уоттаах сэриигэ олунньу ый 11 күнүгэр маҥнайгы сүрэхтэниитэ буолбут. Кулун тутар 2 күнүгэр атаҕар табыллан, бааһыран уһун түүнү быһа сыыллан санчааһын булбут. Онтон кэлин полевой госпиталларга эмтэнэн, кулун тутар 18 күнүгэр Ленинград 2011 №-дээх эвакогоспиталыгар сыттаҕына атаҕа гангреналаан быспыттар. Кулун тутар ый 27 күнүгэр тыылга көһөрбүттэр. Оннук уһуннук эмтэнэн инбэлиит буолан төрөөбүт дойдутугар эргиллэн кэлбитэ.
Ол кэлиэҕиттэн колхозка уонна совхозка эйэлээх олох тутуутугар, производственнай программаны олоххо киллэриигэ бастаан ньирэйи ийэтиттэн арааран иитиигэ, онтон кэлин мөлтөх туруктаах ороһу борооннору сыл таһаарыыга сыралаһан дьулуурдаахтык үлэлээ-битэ. Сэриигэ хорсунун иһин “Албан аат” 3-с степенэ, Аҕа дойду
сэриитин 1 степенэ орденнардаах, И.В. Сталинтан Махтал суруктаах сэрииттэн инбэлиит буолан кэлэн баран, протеһын соһо сылдьан Табаҕаҕа “Коммунизм” колхозка ньирэй көрөөччүнэн үлэлээбитэ. Колхознай-совхознай производстваҕа үрдүк ситиһиилэрин иһин Ленин орденнаах, 1964 с. Мэҥэ Хаҥалас улууһун бочуоттаах гражданина буолбута, соц. күрэхтэһиилэр кыайыылаахтара, Байкалов аатынан бириэмийэ лаураеата. Сааһын тухары бэйэтин харыстаммакка от оттоон, эбии аһылык оҥорон, ньирэйдэрин сайыннары-кыһыннары, биир да күн өрөөбөккө 100 % туттаран көрбүтэ. 50 сыл колхоһун, совхоһун, дьон-сэргэ туһа диэн көлөһүнүн тохпута. Ол иһин норуот таптаан, Егор Дмитриевич Слепцову «Көлөһүн Дьөгүөр» диэн ааттаабыттара.
Табаҕа ыччатыгар, дьонугар-сэргэтигэр Араҥас, Кыыбаайы фермаларыгар сүбэлиир-амалыыр наставник этэ. Көлөһүн Дьөгүөр бэйэтин сүдү уопутун сурукка тиһэн, кыра кэрчик кинигэ бэчээттэппитэ, тарҕаппыта.
Егор Дмитриевич Слепцов-Көлөһүн Дьөгүөр 1994 сыллаахха 74 сааһыгар күн сириттэн барбыта.
Ини-бии Аким уонна Егор Слепцовтар ыарахаттарга бэриммэт үтүө олоҕу олорбут, кэлэр да үйэлэргэ Сахаларын сирин, төрөөбүт төрүт түөлбэлэрин ааттаппыт саха саарыннара буолаллар. Удьуордара үйэттэн үйэҕэ салҕана, эбиллэ, кэҥии турдуннар.
Светлана Макарова, сиэннэрэ
