Биһиги аҕабыт игирэтин аҥара Павел Константинович төрөппүт аҕатынан I Мэльдьэхси нэһилиэгин «Ньыппараах» аҕа ууһугар киирсэр. Кини төрүттэрэ кыһынын Лена өрүскэ баар «Эһэлээх»  арыыга, сайынын «Титииктээх» сайылыгынан олорбуттар.

Кини аҕата, мин эһэм Константин Иванович Шарин эдэр сааһыгар (30-тан тахсаат) сөтөл ыарыытыттан өлбүт. Өлөрүгэр кэргэнигэр Попова Вера Ивановнаҕа кэриэһин маннык диэн эппит: «...уолаттаргын, сүөһүлэргин илдьэ бэйэн дьоҥҥор Мэлдьэхсигэ көһөөр». Онон эбээбит I Мэльдьэхси нэһилиэгэр «Хаар балаҕанҥа» олохтоох ийэлээх аҕатыгар Иван Алексеевич Поповка өрүстэн көһөн тахсыбыт. Ити кэмҥэ 3 саастаах уонна 1 саастаах игирэ уолаттардааҕа. Онон биһиги аҕабыт аах 1915 сыллаахтан таайдарын оҕолорунаан бодоруһан улааппыттар: Дьэбдьиэй, Маайа, Куола, Миитэрэй, Сэмэн, Ааныска, Мотуруона, Боойо.  1927-30 сылларга ыаллар холбоһоннор табаарыстыбалар, онтон  холкуостар тэриллибиттэр.        

Убайбыт Павел «Үүнүү» холкуоска кыра эрдэҕиттэн ыанньыксыт ийэтигэр көмөлөһөрө, ньирэйдэрин көрсөрө. Оччооҕу оҕолор курдук улахан дьоҥҥо барытыгар көмөлөһө улааппыта: сайынын сарсыарда эрдэттэн бастакы туман түһүөр дылы окко сылдьан, оҕуһунан отчуттарга суорат, лэппиэскэ таһан, бурдук быһылыннаҕына түүтэх баайан, соломонон быа бэлэмнээн. Күһүнүн сир паардааһыныгар түүннэри оҕус сиэтэн, миэлиҥсэҕэ бурдук таттарыытыгар түүннэри оҕус үүрсэн.

Эбээбит Вера Ивановна барахсан, огдообо да буоллар, оҕолорун оскуолаҕа үөрэттэрбит. Сэриигэ барыан иннинэ Санникова Матреналыын ыал буолбуттар, кэргэнэ Матрена сэриигэ барбытын кэннэ Светлана диэн кыыс  оҕоломмут, оҕо барахсан аас-туор олохтон уһаабатах.

Убайбыт Аҕа дойдуну көмүскүүр Улуу сэриигэ 1942 сыл бэс ыйын 29 күнүгэр ыҥырыллыбыт. 1943 сыл саҕаланыыта сураҕа суох сүппүт.

Аан дойдуну аймаабыт уоттаах сэриигэ төһөлөөх элбэх саха эдэр ыччата тыына быстыбыта, кэнчээри ыччата кэхтибитэ буолуой.   

     Шарин Эдуард Петрович, быраата,

Мэҥэ-Хаҥалас улууһа, Майа с.