Мин аҕам Кардашевский Михаил Спиридонович 1907 с. Иркутскай область Бодойботугар күн сирин көрбүтэ. Ийэлээх аҕата Үөһээ Бүлүү Боотулуутуттан көмүстээх Бодойбоҕо конон кэлээри улэлии барбыттар. Аҕалара мас кэрдэ сылдьан сураҕа суох сүппүт. Ийэтэ салаасканнан соһон Дьокуускай куоратынан Булуугэ Расторгуев атыыһыкка поварынан үлэҕэ киирэр.

 Ол кэннэ аҕам 10  сааһыгар ийэтэ кэргэн тахсан  Үөһээ Бүлүү Балаҕаннааҕар кэлэллэр.

1930 сылга Үөһээ Бүлүү Балаҕаннааҕар баар "Кыһыл Өтүйэ" колхозка сылгыһытынан үлэҕэ киирэр. 1932 с ийэбэн Григорьева Анна Кириковнаны кэргэн ылар. 1941 сэриигэ барыан иннинэ икки оҕолоох кэргэнин хаалларан 1942 с. Бүлүү военкоматыттан хомуйан Забайкальскай байыаннай уокурукка Иркутскайка илдьэ барбыттара. Баай киһи оҕото диэн арҕаа фроҥҥа ыыппатахтар. Онон илиҥҥи фроҥҥа хаалбыт. 1945 сыллаахха Япония сэриитигэр ыыппыттар, онно 366 артелирийскай полкаҕа сулууспаҕа киирбит. Монголия уута суох куйаарын сатыы туораан, Хинган хайатын уҥуордааҥы Чамчуун, Цыцыган куораттары сэриилээн ылан сэриини түмүктээбитэ. Ол сылдьан биир нуучча саллаатын кытта Япония саллаатын билиэҥҥэ туппуттар. Илиитин өрө ууннарбыттарыгар нуучча саллаата өлөн охтон хаалбыт, көрбүтэ күөмэйигэр кинжал хоройон турар үһү. Японец саллаат ол кинжалтан ураты туох да сэрии сэбэ суох эбит. Ол киһитин ыстаабка илдьэн туттарбыт. Аҕам этэринэн: "Сирэйим дьоппуоҥҥа майгынныыр буолан миигин өлөрбөтө", - диэн кэпсиирэ. Онно киниэхэ Сталин аатыттан махтал суругу туттарбыттара. Сэрииттэн  кэлэригэр "Победа над Японией" диэн мэтээллээх кэлбитэ. 1947 с. " За доблестный труд в великой отечественной войне" мэтээл биэрбиттэрэ.

Сылгыга өр сыллаах үлэтин иһин 1961 с. Саха АССР Үрдүкү Сэбиэтин грамотатынан наҕараадаламмыта.

Уонна элбэх үбүлүөйүнэй мэтээллэринэн уонна  Аҕа дойду Улуу сэриитин II истиэпэннээх уордьанынан наҕараадаламмыта.

1999 с. күн сириттэн күрэммитэ.