Манасытов Иван Петрович (Уһун Уйбаан) Амма Төрдүгэр олорбут. Төрдө Чурапчыга Арыылааҕа диэн быһыылаах. Кэргэнэ Мелания Семеновна. 5 оҕолоох: 4 уол, 1 кыыс. Владимир диэн уол 1 сааһыгар өлбүт.Уйбаан үс уола Аҕа дойду сэриитигэр кыттыбыттар.Саамай улаханнара Роман Иванович-I. 1906 сыллаах төрүөх. 1932 сыллаахха 26 сааһыгар Сырдаабыт колхоз бастакы бэрэссэдээтэлэ буолбут. 1936-39 cc. Мэҥэ Алдан нэһилиэгин Сэбиэтигэр сэкэрэтээрдээбит. 1941 с. сэриигэ бэйэтэ тылланан барбыт. 1942 с. кыргыһа сылдьан ханна өлбүтэ билиҥҥэ диэри биллибэт.Орто уола Роман Иванович-II. Бу мин төрөппүт аҕам буолар. Кини 1910 с. төрөөбүт. Колхозка кассирынан үлэлээбит.Эмиэ убайын курдук улахан хомуурга сэриилэһэ барбыт. Рядовой званиелаах этэ. Сэриилэспит сирэ – Илин, Япония. Онно улахан таһаҕастары тиэйэ сылдьан улаханнык атаҕын өлөрөн 2 сыл госпиталга сыппыт. Ол кэннэ үтүөрэн салгыы сэрии сэбин тиэйээччинэн үлэлээбит. 1946 сыллахха этэҥҥэ Мэҥэ-Алдаҥҥа төннүбүт. Японияны кыайыы иһин мэтээллээх.Кэлэн Саввиннар кыыстарын кэргэн ылбыт, 1947 сыллаахха бастакы оҕото төрөөбүт. Уолун сэрииттэн төннүбэтэх кыра быраатын аатынан Сэмэн диэн ааттаабыт. Кэргэнэ ыалдьан өлбүтүн кэннэ, иккистээн 1952 c. 5 оҕолоох cэрии огдооботун Тарасова Мария Прокопьевнаны кэргэн ылбыт, кыыс оҕоломмуттар. 1961 c. иккис кэргэнэ сэлликтэн өлбүтүн кэннэ Кириэс Халдьаайыга тахсыбыт. Онно олохсуйбута, эмтэммитэ. Оҕолорун ыарытыннаран кэбиһиэм диэн кэлбэтэҕэ. Саамай хомойорум диэн ол. Ол иһин аҕам туһунан аҕыйаҕы билэбин. 1971 с. төттөрү Мэҥэ-Алдаҥҥа кэлбитэ. 1973 с. бу сиртэн бараахтаабыта.Саамай кыра уол Семен Иванович. 1922 сыллаахха бу күн сирин көрбүтэ. Колхоз биригэдиирэ. 1941 сыллаахха сэрии буоларын сэрэйбэккэ үөрэх ыла диэн куоракка тахсыбыта. Кэнники Мэҥэ-Алдаҥҥа этэллэринэн, куораттан сэриигэ барбыт сурахтааҕа. Сэриигэ младшай лейтенант этэ. Танкаҕа радистаабыта. 1943 сыллаахха балаҕан ыйын 15 күнүгэр сэриигэ өлбүтэ. Смоленскай уобаласка Биенка диэн дэриэбинэ таһыгар көмүллэн сытар.Бу курдук Уйбаан уолаттара хорсуннук сэриилэспиттэрэ.
Манасытов С.Р. кэпсээнин сиэнэ Манасытов Байдам суруйда//«Сырдаабыппыт –сырдык, сылаас өйдөбүлбүт”
(хомуйан оҥордо С.А.Винокурова), -Дьокуускай, 2017 с., 101-102 стр.
