Саввин Семен Хрисанфович туһунан

Улахан үлэһит, чиэһинэй, күүстээх-уохтаах, күлбүт-салбыт, үөрүнньэҥ киһи,  Аҕа дойду Улуу сэриитин кыттыылааҕа, Саввин Семен Хрисанфович 1911 сыллаахха Таатта улууһугар Соҕуй диэн сиргэ күн сирин көрбүт.Борбуйун көтөҕөн, киһи-хара буолан, билиҥҥи Томпо улууһун Сырдаабытыгар кэлэн олохсуйар. Эдэр киһи Тарасова Мария Никитичналыын таптаһан холбоһоллор, 1938 сыллаахха уоллара Бүөтүр төрүүр.  Сэмэн «Сырдаабыт» колхозка үлэлээн-хамнаан улахан өҥөнү оҥорбут киһинэн буолар: биригэдьиир, сылгыһыт. Уһун уҥуохтаах, бөдөҥ киһи этэ диэн дьон ахтар.Бу курдук иллээхтик олордохторуна сэрии саҕаланар, онон 1942 сыллаахха фроҥҥа ыҥырыллан, Арҕаа Аҕа дойдутун көмүскүү барар. Кинини инники фроҥҥа ыыталлар. Фашистар оккупациялаабыт территорияларыгар сэриилэһэр ыарахан да буоллаҕа!

Саввин Семен Хрисанфович 1944 cыл олунньу ыйыгар Смоленскай уобалас эҥэр буолбут биир ынырыктаахай хапсыһыыга охсуһуу үөһүгэр охтор. Кыра да хаалбыта...Кини сырдык аатын умнубаппытын биллэрэн, сэриилэспит сиригэр сиэннэрэ Афанасий уонна Петр Саввиннар аҕыйах сыллааҕыта көмүллүбүт сиригэр тиийэ сылдьыбыттара. Буойун улахан сиэнэ Семен төрөөбүт сирин буорун бырааттарыгар Сырдаабыттан аҕалан биэрбитин илдьэн эһэлэрин уҥуоҕар куппуттара, истиҥ махталбытын тиэрдибиттэрэ, эһэбит аата Смоленскай анныгар братскай могилаҕа суруллан турарын илэ харахтарынан көрбүттэрэ. Ийэ сирин геройдуу көмүскэспит, биһиги билиҥҥи дьоллоох, эйэлээх олохпут иһин охсуспут киһи буоларынан биһиги, 4 сиэннэрэ, 11 хос сиэннэрэ,  киэн туттабыт!

Максимова Н. П., буойун//«Сырдаабыппыт –сырдык, сылаас өйдөбүлбүт” (хомуйан оҥордо С.А.Винокурова), -Дьокуускай, 2017 с., 102 стр.