Тролуков Василий Акимович Нэлимҥэ 1912 сыллаахха төрөөбүтэ. Аҕата Аким Иванович, ийэтэ Ульяна Ильинична диэннэр. Ийэтэ кини кыратыгар өлбүт.
Василий Акимович бииргэ төрөөбүт 4-лэр, 2 кыыс, 2 уол. Маайа, Аана, Уйбаан диэннэр. Маайа куоракка кытай киһитигэр кэргэн тахсан, икки оҕолонон баран өлбүт. Аана кыратыгар Лөгөйгө иитиэх баран, хас да оҕолоно сылдьыбыт. Уйбаан эдэригэр ыалдьан өлбүт, оҕото суох.
Василий ол саҕана кыайан үөрэммэтэх, ол иһин улахан дьону ааҕарга, суруйарга үөрэтэр Ликбез диэҥҥэ үөрэммитэ. Оскуола паартатыгар олорботоҕо.
Сааһын  ситэн баран, колхозка хара үлэҕэ үлэлээбитэ. Онтон кыладыапсыгынан үлэлии сылдьан, фашисткай Германия сэриинэн саба түспүтүгэр, 1941 сыллаахха бэс ыйыгар бэбиэскэ туппута. Онтон сэриигэ аттаммыта. Кини Москва куорат  туһаайыытынан Ивановскай уобаласка сэриилэспитэ. Онно сылдьан хаҥас илиитигэр бааһыран госпиталга киирбит. Итинтэн сылтаан 3 группалаах инбэлиит буолан дойдутугар төннөн кэлбитэ. Кэлээт да колхозка хара үлэҕэ үлэлээбитэ.
1945 сыллаахха Ховрова Мария Ивановнаны кытта холбоһон, Нэлим колхозка олорбуттара. Онно Баһылай кыладыапсыгынан, кэлин хону биригэдьииринэн үлэлээбитэ. Онтон бөдөҥсүйүү саҕана «Маяк» колхозка көһөн киирэллэр. Кинилэр 5 оҕолоноллор 4 кыыс, 1 уол.