Севостьянова Евдокия Васильевна 

Мин 1930 сыллаахха I Малдьаҕар нэһилиэгэр Тойон Арыыга төрөөбүтүм. 1938 сыллаахха Булгунньахтаахха 1-кы кылааска үөрэнэ киирбитим, ситэтэ суох 7 кылааһы бүтэрбитим. 1941 сыллаахха пионер кэккэтигэр киирбитим, 13 саастаахпар 1943 сыллаахха  комсомолга тылланан киирбитим. Оскуолаҕа үөрэнэр кэмнэрбэр дружина советыгар сылдьан председателинэн, этэрээт баһаатайынан сылдьыбытым. 1948 сыллаахха Булгунньахтаахха пионерскай лааҕырга баһаатайынан үлэлээбитим. 1950 сыллаахха комсомол оройуоннааҕы комитетыттанХачыкаат 7 кылаастаах оскуолатыгар оздоровительнай лааҕырга баһаатайынан үлэлээбитим, онно 75 оҕолоох этибит. 7-с кылааһы үөрэнэн бүтэрэн баран «Правда» колхозка үлэҕэ киирбитим. 1954 сыллаахха комсомол оройуоннааҕы комитетын Пленумун чилиэнинэн талыллыбытым. 1957,1958,1959 сс. комсомольскай үлэҕэ, 1959 сыллаахха оройуоннааҕы комсомол XVII конференциятыгар пленум чилиэнинэн талыллан 1962 сыллаахха дылы сылдьыбытым. 1960 сыллаахха алтынньы ыйга бэйэм баҕабынан Гаганова бачыымын өйөөн V Малдьаҕарга (оччотооҕуга) “Орджоникидзе” колхозка доярканан барарга ыҥырыы таһаарбытым. Миигин өйөөн “Дьөппөн” колхоз доярката Алексеева Мария Васильевна, “Төхтүр” колхоз доярката Мордовская Варвара Петровна, Иһит 8 кылаастаах оскуолатын директора Тетерин Аркадий Михайлович, колхоз председателэ Федоров Алексей Михайлович  партком секретарынан, ону сэргэ икки механизатор Петров, Соловьев буолан үлэлээбиппит. Икки сыл устата таһаарыылаахтык үлэлээн партия райкомун бюротун уурааҕынан Иһиккэ ферма биригэдьииринэн анаабыттара. Ол үлэлээбит кэммитигэр биир да былааны толорботох сылбыт суоҕа. Кыра эрдэхпиттэн дьону кытта уопсай тылы булан үлэлии сатыыр этим. Ону учуоттаан 1959 сыллаахха 1-кы семилетка сылыгар Верховнай Сэбиэт Президиумун Бочуотунай Грамотатынан наҕараадаламмытым. 1959 сыллаахха республикатааҕы слекка «Коммунистическай үлэ ударнига» ааты иҥэрбиттэрэ. Оройуонтан, комсомол КК-тэн, 1958 с. комсомол обкомуттан хас да төгүл Бочуотунай грамота, махтал сурук наҕараадалаахпын. 37 сыл устата үлэлиир кэмнэрбэр нэһилиэк депутатынан, сэтээтэлинэн, партийнай, комсомольскай секретардарынан хас да төгүл быыбардаммытым, Ону таһынан дьахталлар, төрөппүттэр комитеттарын председателинэн, местком председателинэн талыллан үлэлээбитим. 7 оҕону иитэн таһаардым.

Наҕараадаларым:

- Социалистическай куоталаһыы туйгуна;

- Ыччат бочуоттаах наставнига;

- XI пятилетка гвардееһа;

- «Үлэ бэтэрээнэ» мэтээл;

- «Ийэ буолуу 3 ст.» уордьан.

    .