Александров Евгений Петрович
Олунньу ый 12 күнүгэр 1942 сыллаахха Ι Малдьаҕар Кытаанах Кырдал дэриэбинэтигэр холкуостаах дьиэ кэргэнигэр төрөөбүт. Аҕата Александров Петр Прокопьевич 1941 сыллаахха күһүн Аҕа дойду сэриитигэр барбыт уонна сэрии хонуутугар охтубут. Ийэтэ Александрова-Мордовская Д.П. «Үүнэр ыччат» холкуоска эдэр сааһыттан саҕалаан өр сылларга ыанньыксыттаабыт. Кэлин 70-с сылларга сельхозка техүлэһитинэн сылдьыбыт. 80 сааһыгар өлбүт. Евгений Петрович сытыы-хотуу этэ, 1949 сыллаахха Дьобулҕа сэттэ кылаастаах оскуолатыгар үөрэнэ киирбитэ, кэлин иккис-үһүс кылааска Покровскайга таайыгар үөрэммитэ. 1960 сыллаахха Булгунньахтаах оскуолатын сэттис кылааһын бүтэрбитэ уонна 1961 сыл армияҕа ыҥырыллан Камчаткаҕа үс сыл сулууспалаабыта. Кини хайыһарга Камчатскай уобаласка түөрт төгүл чемпионнаабыта, көҥүл тустууга 52 киилэҕэ бастакы миэстэ буолбута. 1963 сылтан «Правда» холкуос комсомольскай тэрилтэтин босхоломмут сэкирэтээринэн үлэлээбитэ, онтон Читаҕа совпартшколаҕа үөрэммитэ. 1968 сыллаахха холкуоһугар төннөн кэлэн орто сүһүөх салайар сулууспаҕа биригэдьииринэн үлэлии сылдьан ССКП кэккэтигэр киирбитэ. Онтон Усть-Янаҕа 1970 сылтан ананан баран 1980 сылга диэри араас салайар үлэлэргэ үлэлээбитэ. Хабаровскайдааҕы университет юридическай факультетын бүтэрбитэ. Казачьеҕа олоҕун аргыһын Горохова Ирина Михайловнаны көрсөн ыал буолбута. Биэс оҕоломмуттара. 1980 сыл Качикат сэбиэтин бэрэссэдээтэлинэн 1982 сылга диэри үлэлээбитэ. 1982 сыллаахтан «Булгунньахтаах» совхоз коммерческай чааһын директорын солбуйааччынан 1985 сылга спортинструктордыы барыар диэри үлэлээбитэ. 1992 сыл дуобакка үрдүк категориялаах международнай кылаастаах судьуйа аатын сүкпүтэ. 1989 сыллаахха Москва куоракка ССРС норуоттарын Бастакы рабочайдар спартакиадаларыгар велоспортка Союз үрдүнэн ΙΙ миэстэни ылбыта. 2006 сылга «Отличник ДСО «Урожай» уонна «За вклад в развитие физической культуры и спорта в сельской местности республики» түөскэ кэтэр знагынан наҕараадаламмыта, 2008 с. «Почетный работник ДСО «Урожай» буолбута. 1994 сылтан Булгунньахтаах орто оскуолатыгар охраннигынан үлэлээн пенсияҕа 1999 сыллаахха тахсыбыта. Кини түөрт уол, үс кыыс сиэннэрдээх. Аҕабытын кэриэстээн сылын аайы Тойон Арыыга буолар ыһыахха аҕабыт аатынан спорт араас көрүҥнэригэр бириис олохтоон оҕолоро ыытабыт.
Оҕолоро Женя, Ира, Дария, Петр Александровтар
