Иванов Зосим Степанович
1936 сыл ыам ыйын 25 күнүгэр өҥ сирдээх Тойон Арыыга төрөөбүт. Аҕата Степан Андрианович 1943 сыллаахха сэриигэ өлөр. Сэттэлээх уолу булчут таайа Самыылай илдьэ сылдьыбыт. Кыралар аччыктаан ытастахтарына Зосим: «Таайбыт Кэтэмэттэн тайах баһа аҕалыа, нохолоор, хотуойдаар, ытаһымаҥ», - диэн саататан ырыа ыллаабытын хойукка дылы чугас ыаллара санаһаллар эбит. Зосим эмдэй-сэмдэй бырааттарын Сергейи, Давыды кытта улаатан төлөһүйэн испиттэр.Дьиэлэрин иһигэр тустан тилигирэһэн, олоппос атахтара, орон хаптаһыннара алдьананнар, сэмэлэнэллэрэ да элбээбит. Эдэр дьон күүстэрэ киирэн тустар буолан барбыттар. Зосим Степанович маҥнай колхоһун ыһыаҕар, онтон оройуоҥҥа, кэлин республикаҕа киирэн хапсаҕайдаһан тустууга кыттыталаабыт. Бу эдэр, уһулуччу күүстээх, боруонсаттан кутуллубут курдук толору быччыҥнардаах уол туста киирбит дьонун кэбирэхтик хам баттаталыыра үһү. Ол саҕана Саха сиригэр көҥүл тустуу саҥа сайдан эрэр кэмэ. 1956 с. Зосим Москваттан кэлэ сылдьар спорт маастара Иван Морозов эрчийэр көҥүл тустуу секциятыгар кэлбит. Сааһа сүүрбэтэ. Бэрт сотору бу Иванов бөҕөс туһунан үһүйээҥҥэ тэҥнээх «суллаабыт тиит саҕа харылаах», «Геракллыы утарсааччытын салгыҥҥа өрө көтөҕөн таһаарар» эҥин диэн кэпсээннэр тарҕанан барбыттар. Кырдьык, Зосим Иванов айылҕаттан уһулуччу күүстээх, эдэр буолан 15-тии мүнүүтэ мөлтөөн-ахсаан көрбөккө тустан хадьыктаһара үһү. Кыайыылара – көбүөргэ ыраастык ууруу. Уол хардатын, бииртэн биир астык кыайыылары көрдөртүүр буолбут. Аҕата көтөхпүт 9 буут (145 киилэ) ыйааһыннаах тааһын кини 1957 сыллаахха көтөҕөн дьон-сэргэ биһирэбилин ылбыт. Зосим тааһы түөһүгэр дылы көтөҕөн аҕалан баараҕай тиит чөҥөчөгүн үрдүгэр уурбут. 1960 сылга Россия «Урожай» обществотын чемпиона буолан сахалартан иккис киһинэн көҥүл тустууга Советскай Союз спордун маастара буолбут. Зосим Степанович идэтинэн суоппар. 1974 сыллаахха Ньурбаҕа 3-с нүөмэрдээх СПТУ-ну бүтэриэҕиттэн араас тэрилтэлэргэ суоппарынан үлэлээбит. 1996 сылтан Хаҥалас улууһун бочуоттаах олохтооҕо, «Гражданская доблесть» бэлиэ хаһаайына. 2005 с. Булгунньахтаахха норуот күүһүнэн тутуллубут спортзал ΧΧ үйэ уон бастыҥ бөҕөстөрүттэн биирдэстэрэ Иванов З.С. аатын сүгэр. 2006 с. «Всенародное покаяние» мэтээл хаһаайына буолбута.
