Сироты войны

 
 
Годы жизни: 1931-2007

Никифоров Василий Давыдович

Никифоров Василий Давыдович 1931 сыллаахха II Наахара нэһилиэгэр төрөөбүтэ. Төрөппүт аҕата Никифоров Давыд Иннокентьевич 1942 с. Аҕа дойду Улуу сэриитигэр ыҥырыллан барбыта. Ол сыл Сталинград (Волгоград) уоттаах кыргыһыытыгар өлбүтэ. Сэриигэ барыар диэри холкуоска биригэдьиирдээбит.  Ийэтэ Варвара Гаврильевна Никифорова (Баартыйалаах Балбаара)  сэрии уот- кураан сылларыгар эр киһи үлэтин толорбута. Ааллаах Үүҥҥэ таһаҕас таһыытыгар бара сылдьыбыт. 1947 с. партия чилиэнэ.  

Никифоров Василий Давыдович сэрии кэмигэр 10 саастааҕа. Улахан дьону кытта тэҥҥэ үлэлиирэ. Фермаҕа от- мас тиэйиитэ, от- бурдук хомуйуута.  Онон олох кыһалҕатын, сут- кураан сылларын этинэн- хаанынан билэн улааппыта. СГУ-га үөрэнэн историк идэтин ылбыта. Манна үөрэнэр сылларыгар спордунан дьаныардаахтык дьарыктаммыта. Тустара, ядро, гиря анньыытыгар рекордары олохтообута. Хайыһарга өрүү бириистээх миэстэлэри ылаттыыра. Үөрэҕин бүтэрэн тахсан Байкалов аатынан, “Наахара” сопхуостарга тустууга, мас тардыһыытыгар хас да сыл чемпионнаабыта, призердаабыта. Төрөөбүт дойдутугар Наахараҕа оскуолаҕа учууталынан, завуһунан, директорынан, военругунан, сельсовет бэрэссэдээтэлинэн  тахсыылаахтык үлэлээбитэ. Оройуоҥҥа байыаннай үөрэҕи маҥнайгынан төрүттээн элбэх үлэни ыыппыта. Үөрэтэр оҕолоро оройуоҥҥа үс сыл субуруччу бастаанннар, көһөрүллэ сылдьар Кыһыл Знамяны үйэ саас тухары илдьэ хаалбыттара. Киниэхэ үөрэммит уолаттар туйгуннук сулууспалаан, байыаннай чаастан махтал суруктар кэлэллэрэ. ССРС  үөрэҕин министэристибэтин, ЫБСЛКС, ССРС, ДОСААФ  КК дипломунан наҕараадаламмыта. Пенсияҕа тахсан баран, баай ис хоһоонноох “Үлэ уонна бойобуой албан аат” музейын тэрийбитэ. Нэһилиэк историятын, олохтоохторун төрүттэригэр-уустарыгар, Наахара орто оскуолатын историятыгар, Аҕа дойду Улуу сэриитигэр өлбүт биир дойдулаахтарын ааттарын, ханна харалла сыталларын чуолкайдааһыҥҥа үлэлээбитэ. Кини дойдута сайдарын туһугар бүтүн олоҕун анаабыта.   Кэргэнинээн Елена Васильевналыын 51 сыл бииргэ олорбуттара. 4 о5олоохтор, элбэх сиэннэрдээхтэр.   Василий Давыдович сэрии тулаайаҕа, тыыл уонна педагогическай үлэ бэтэрээнэ, РСФСР үөрэҕириитин туйгуна, II Наахара нэһилиэгин уонна Мэҥэ-Хаҥалас улууһун бочуоттаах олохтооҕо, саппаас майора.   Ыараханнык ыалдьан 2007 сыллаахха  өлбүтэ.

Место рождения: Мегино-Кангаласский улус, 2-й Нахаринский наслег
ПОДЕЛИТЬСЯ СТРАНИЦЕЙ