Герой-ийэ Маркова Мария Ивановна 1938 сыллаахха алтынньы 6 күнүгэр  Тойон Арыыга  холкуостаах дьиэ кэргэҥҥэ төрөөбүт. Аҕата Иван Григорьевич «Күөх оттоох» холкуоска араас үлэҕэ күүһүн харыстаабакка үлэлээбит. 1942 сыллаахха  Аҕа дойду сэриитигэр ыҥырыллан баран сураҕа суох сүппүт. Бииргэ төрөөбүттэр иккиэлэр. Ийэтэ Анисия Степановна үс оҕолорун соҕотоҕун ииппит. Мария 1954 сыллаахха Тойон Арыы оскуолатын бүтэрэн баран Дьокуускайга иистэнньэҥнэр курстарыгар үөрэммит. Салгыы путевканан Өлүөхүмэҕэ Бөтүүн диэн дэриэбинэҕэ иккиэ буолан үлэлии тиийбиттэр. Сергеева Варята ыалдьан дойдутугар төннүбүт. Онтон суол аһыллыбытын кэннэ бастакы пароходунан Мария эмиэ дойдутугар кэлбит. 1957 сыллаахха Иванов Алексей Ивановичтыын олохторун холбоон утуу-субуу уон биир оҕону күн сирин көрдөрбүттэр.1966-1968 сылларга Тойон Арыы детсадыгар «Өктөөпкө» үлэлээбит. 1969 сылга Булгунньахтаахха көһөн тахсыбыттар, детсадка солбуйааччынан сылдьыбыт. 1971 сыл кулууп котельнайыгар кочегардаабыт, кэлин 1988 сылга пенсияҕа барыар дылы кулуупка дьиэ сууйааччынан үлэлээбит. 1979 сыллаахха алтынньы ый 3 күнүгэр киниэхэ «Герой-ийэ» аата иҥэриллибит. Олохтоох культура дьиэтигэр норуот сынньанар усулуобуйатын тэрийиигэ элбэх сыратын биэрэн эҥкилэ суохтук үлэлээбит. Ону үрдүкү салалта бочуотунай грамоталара, эҕэрдэ суруктара туоһулууллар. Оҕолоро улаатан араас идэлэри баһылаан төрөөбүт түөлбэлэринэн, Дьокуускай куоратынан үлэлии-хамсыы сылдьаллар. Билигин 27 сиэн, 16 хос сиэн эбэтэ. 2005 сылтан «Үлэ ветерана» мэтээллээх.