1940 сыллаахха кулун тутар 25 күнүгэр төрөөбүтэ. Аҕата Засимов Савва Гаврилович 1906 сыллаахха Орджоникидзевскай оройуон Хачыкаат нэһилиэгэр төрөөбүт. Дьокуускай куоракка педрабфакка учууталлаабыт. 1941 с. сэриигэ ыҥырыллыбыт. Гвардия младшай лейтенана, 8-с гвардейскай стрелковай дивизия 30-с гвардейскай стрелковай полкатын минометнай взводун командира. 1944 с. атырдьах ыйын 2 күнүгэр сэрии толоонугар өлбүт. Латвийскай ССР Варакланы куоратын аттыгар Репша диэн дэриэбинэҕэ көмүллүбүт. Ийэтэ Афанасьева Анна Дмитриевна Полина биирин туола илигинэ өлбүт. Аҕата сэриигэ барарыгар Полина ийэтинэн эбэтэ Афанасьева Марияҕа  хаалбыт. Эбэтэ Полина биэстээҕэр өлбүт. Онтон эдьиийигэр Афанасьева Евдокия Дмитриевнаҕа иитиллибит. Полина Саввична 1957 с. холкуоска ыанньыксытынан, кочегарынан үлэлээбит. 1969–1978 сс. Булгунньахтаах маслоцеҕар лаборанынан, 1978–1980 сс. Булгунньахтаах деткомбинатыгар ньээҥкэнэн үлэлээбит. 1980–1992 сс. Орджоникидзевскай оройуоҥҥа бюджет статистикатын отделыгар старшай статистигынан үлэлээбит. Үчүгэй үлэтин иһин почетнай грамоталарынан, сыаналаах бэлэхтэринэн наҕараадаламмыт. Үлэ бэтэрээнэ. “Ийэҕэ Албан аат” 1,2,3 степеннээх мэтээллэр кавалердара. 1960 сыллаахха Иванов Давыд Степановичка кэргэн тахсан ыал буолан Хаҥалас улууhун I Малдьаҕар нэhилиэгэр олорор. 9 оҕону төрөтөн, улаатыннаран ыал оҥортоон, 30 сиэннээхтэр, 10-тан тахса хос сиэннээхтэр.

                            Иванова Сардана Семеновна

     Тохсунньу 25 күнэ, 2015 сыл.  Булгунньахтаах сэл.