Сироты войны

 
 
Годы жизни: 1937

Мин 1937 сыллаахха Мэҥэ-Хаҥалас 2-с Тыыллыма нэһилиэгэр төрөөбүтүм. Биһиги бииргэ төрөөбүттэр 4 этибит. Аҕабыт 1942 с. Аҕа дойду сэриитигэр барбыта уонна төннүбэтэҕэ. Ийэбит 1945 сыллаахха сүрэҕинэн утуйбутунан өлөн хаалбыт этэ. Онон тулаайах хааламмыт аҕабыт  эдьиийигэр мин уонна кыра быраатым буолан иитиллибиппит. Улахан убайым кэргэннэнэн баран биһигини ылбыта. Онно, Буотамаҕа, 4 кылааһы бүтэрбитим. Онтон Ороссолуодаҕа кэлэн леспромхозка үлэлээбитим. Кыра саастаах буолан справканан үлэлиир этим. Үлэҕэ сүрдээх дьоҕурдаах этим. «Барытын кыайыам» диэн девизтээх этим. Леспромхозка дьиэ сууйбутум уонна үлэһиттэргэ таһырдьа уот оттон, мууһу тоҕута сынньан 80-ча киһиэхэ чэй өрөрүм. Өссө мас кэрдиитигэр сылдьыбытым, барыта илии үлэтэ. Охторбут маспыт мутугун хомуйан соскойдоһорбут. Ол сылдьан маска баттатан өлө сыспыттаахпын. Хата, бииргэ үлэлиир нуучча киһитэ быыһаабыта. Мас уһаарыыта, болуот оҥоруута, кирпииччэ үктээһинэ ыарахан да этэ. Кэлин тэрилтэбит «Куруҥнаах» диэн сиргэ көспүтэ. Онно 1957 сыллаахха Харитонов Платон Иванович диэн холку уолга кэргэн тахсыбытым. Дьэ, ити сылтан 1987 сылга пенсияҕа тахсыахпар дылы дояркалаабытым. Бастаан 9 сыл «Правда» колхозка. 1965 сылтан «Өктөөп 50 сыла» ыччат-комсомольскай фермаҕа наставниктаабытым. Былааны аһары куоһаран үрдүк көрдөрүүнү ситиһэн комсомол «Кыһыл көмүс куолас» мэтээлинэн наҕараадаламмытым. «Саха АССР бастыҥ доярката», «Ыччат наставнига» ааттары иҥэрбиттэрэ, 2 төгүл олохтоох сэбиэт депутатынан  талыллыбытым. Социалистическай куоталаһыы кыайыылааҕа, коммунистическай үлэ ударнига буолуталаабытым. В.И.Ленин 100 сааһын туоларыгар «Үлэҕэ килбиэнин иһин» мэтээл кэппитим. 1969 с. партияҕа киирбитим. 1986 с. Москваҕа Норуот хаһаайыстыбатын ситиһиилэрин быыстапкатыгар сылдьар чиэстэммитим. Кэргэним эрдэ олохтон туораан оҕолорбун соҕотох улаатыннаран билигин 11 сиэннээхпин, 13 хос сиэн баар. 6 оҕону төрөтөн «Ийэҕэ Албан аат» 3-с степеннээх уордьанынан наҕараадаламмытым.  Иккис дойдум оҥостубут Тойон Арыыбар олоробун. Эдэр сааспар ылыммыт «барытын кыайыам» диэн девизпин ыһыктыбакка олохпун олорон кэлбиппинэн бэйэбин чиэстиибин уонна онон дьоллоохпун.

Место рождения: II Тыллыминский наслег Мегино-Кангаласского района ЯАССР
ПОДЕЛИТЬСЯ СТРАНИЦЕЙ