1938 сыллаахха сааһы көрсө муус устар 10 күнүгэр төрөөбүт. Ийэтэ дояркалаабыт, ииппит аҕата Тимофеев Тимофей Герасимович көҥүл иһин туруулаһа сылдьан сэрии толоонугар охтубут. Салгыы үөрэнэр кыаҕа суох буолан 5 кылааһынан уурайбыт. Саҥа улаатан эрэр кыыс эдэркээн колхозтаах буола түспүт. Сэрии кэнниттэн 40 сыл сүөһү көрүүтүгэр үлэлээбит. Елизавета Саввична ыанньыксыттаабыт сылларыгар үрүҥ илгэни үрүйэлии сүүрдүбүт, ыччат сүөһүнү төлөһүппүт бастыҥ үлэһит буолар. 1967 сыллаахха Саха АССР Орджоникидзевскай оройуоннааҕы үлэһиттэрин депутатынан талыллыбыт. 1969 с.  «Сүөһү көрүүтүн 2-с кылаастаах маастара», 1969, 1973 сылларга икки төгүл «Коммунистическай үлэ ударнига», 1976 с. «9-с пятилетка ударнига», 1981 с. «Сүөһү көрүүтүн 1-кы кылаастаах маастара», «Россия тыатын хаһаайыстыбатын социалистическай куоталаһыытын туйгуна», «Ыччат бочуоттаах наставнига», «Үлэ ветерана» үрдүк бэлиэлэр, 20-тэн тахса бочуотунай грамоталар үлэтин остуоруйатын кэрэһилииллэр. 1957 с. Японияны үлтүрүтүү кыттыылааҕа Никифоров Николай Ильичтыын олоҕун холбоон 6 оҕону төрөппүт. Олох хаһан даҕаны очура суох буолбат. Кэргэнэ күөгэйэр күнүгэр сылдьан ыарахан ыарыыттан күн сириттэн күрэммитэ.