– Мин 1939 сыллаахха ахсынньы ый 10 күнүгэр Сата нэһилиэгэр үлэһит дьиэ кэргэҥҥэ үһүс оҕонон төрөөбүтүм, икки убайдаахпын. Ийэм Чемезова Александра Кононовна, аҕам Чемезов Василий Григорьевич. Аҕам 1942 сыллаахха бэс ыйын 6 чыыһылатыгар сэриигэ барбыт уонна эргиллибэтэх, сураҕа суох сүппүттэр испииһэктэригэр киирэ сылдьар. Аҕабыт сэриигэ барбытыгар ийэбит 3 оҕолоох хаалбыт. Кини «Коминтерн» холкуоска ыанньыксытынан үлэлээбит. Мин кыра сылдьан ийэбэр ньирэйдэри хомуйан хотоҥҥо баайталыыр этим, ыыр кэмигэр ынахтарын этэрэн биэрэрим. Сэрии кэмигэр үчүгэй таһаарыылаах үлэтин иһин ийэм «1941–1945 сс. килбиэннээх үлэтин иһин» диэн мэтээллээх холкуос стахановеһа этэ. Ийэм мин оскуоланы бүтэрэр сылбар өлбүтэ. Икки убайдарым эмиэ өлбүттэрэ. Мин балтыбынаан уонна маачаха аҕабынаан хаалбытым. Оскуоланы 1961 сыллаахха бүтэрбитим. Биһиги оскуоланы бүтэрэн баран  бачыым көтөҕөн «Правда» холкуоска кылааһынан үлэлии хаалбыппыт. Ол икки сылга хотон, дьиэ тутан «Аартык» ферматын тэрийбиппит. Кыргыттар ыанньыксыттаабыттара, уолаттар хара үлэҕэ үлэлээбиттэрэ. 2 сыл үлэлээн баран Бүлүүтээҕи педучилищеҕа  үөрэнэ барбытым. Аҕам кыыһынаан хаалбыттара. 2 сыл үөрэнэн начаалынай кылаас учууталын идэтин ылан 1965 сыллаахха Уус-Алдан улууһугар үлэлии барбытым. 2 сыл үлэлээн баран, дьоннорум кыамматтарынан сибээстээн Булгунньахтаах оскуолатыгар 1967 сыллаахха кэлбитим. Манна кэлэн начаалынай кылаас учууталынан 1998 сылга дылы үлэлээбитим. Онтон 1998 сылтан 2006 сылга дылы оскуола музейыгар сотруднигынан үлэлээбитим. Үрдүк категориялаах учууталбын. 2006 сыллаахтан сынньалаҥҥа олоробун. Музейга үлэлиир сылларбар биһиги музейбыт республикаҕа биллэр бастыҥ үлэлээх музей буолбута. Наҕараадаларым: «Үлэ ветерана» мэтээл, РСФСР-тан бочуотунай грамоталаахпын, ону таһынан нэһилиэк, оскуола, улуус, хайҕал суруктара бааллар. Өр сылга оскуола профсоюһугар үлэлээбитим, онон профсоюз 70 сылыгар профсоюз бэлиэтинэн наҕараадаламмытым.