Эбэбит Дмитриева (Захарова) Ефросинья Николаевна – Оппуруоһа 1906 с. II Наахара нэһилиэгэр төрөөбүт. 1924 сыллаахха Дмитриев Иннокентий Афанасьевичтыын ыал буолаллар. 1934 сылтан Хара нэһилиэгин “Сталин” холкуос эмиэ биир туруу үлэһитэ. Эһэлээх эбэбит, оччотоооҕу кэминэн сэниэ ыал, 1934 с. холкуоска киирэллэригэр баһаам элбэх баайдарын холбообут эбиттэр – отучча төбө сүөһү, көлүнэр көлө, от охсоро. Эһэбитинээн сэрии ас-таҥас тиийбэт ыарахан сылларын, сэрии кэнниттэн умайар уот кураан кэм эрэйин-муҥун тэҥҥэ эҥэрдэһэн, өрүү ыанньыксытынан, ньирэй, көрөөччүнэн сылдьан ферматтан илиитин араарбатах. Кэлин, 50-с сыллар саҕаланыытыттан, сибиинньэ көрөөччүнэн үлэлээбит. 1962 с пенсияҕа тахсан баран Хаптаҕайга көһөн киирэн олохсуйбуттар, онно да олорбокко ньирэй, субан сүөһү көрбүттэр.
Эһэлээх эбэбит уон иккитэ оҕоломмуттарыттан үс оҕолоро улаатан, ыал, үлэһит буолбуттар. Оччотооҕу дьахтар оҕолоннум диэн олорбокко, илиитин үлэттэн араарбакка, аанньа көрүүтэ-истиитэ суох буолан оҕолоро кыраттан да сыыстаран бараахтыыллара буолуо. Улаханнара – биһиги ийэбит Дмитриева Фекла Иннокентьевна (1928 с. муус устарга төрөөбүт) уонна икки уол, иккиэн биир ааттаахтар Дмитриев Иннокентий Иннокентьевич I уонна II. Ону таһынан, икки оҕону ииппиттэрэ: Хатас дьахтара хаалларан барбыт ыарыһах уолу – Оконешников Михаилы (Мэхээчэ, 1917 с.т.) уонна аймахтара, тулаайах уолу, Дмитриев Константин Николаевиһы II, ону таһынан аҕа дойду сэриитин кэмигэр тулаайах хаалбыт оҕолору: Павлов Петр Павловиһы, Яковлева Улита Гаврильевнаны иитэн, үөрэттэрбиттэр. Ол саҕана ас-таҥас кэмчи кэмигэр, кыараҕас дьиэ-уот ону ол диэбэккэ эһэлээх, эбэбит аһыныгас, чараас сүрэхтээх дьон буолан кыамматы-түгэммэти салҕыыр, иитэр буоллахтара дии. Холхуос сүөһүтүн аһын көрүүгэ, түбүктээх үлэҕэ сылдьар дьонҥо, өссө дьиэлэригэр эмиэ эбии түбүк буоллаҕа дии. Ол саҕана бэлэм таҥас-сап суох, эбэм барахсан түбүктээх үлэ кэнниттэн, киэһээ иистэнэн бооччойоохтообута буолуо. Аны хамнас суох, үлэлэрин күнүнэн дохуот диэн этинэн, арыынан аахсаллара. Өйдүүбүн оннооҕор 50-с сыллар бүтүүлэригэр оннук этэ, аҕабыт киирэн куоракка этин, арыытын атыылаан кыра таҥас-сап атыылаһан тахсара, биһиэхэҕэ оҕолорго тимир баанкалаах кэмпиэттээх буолара.
Эбэбит Оппуруоһа күүстээх-уохтаах, иҥиир ситии, кыайыгас үлэһит, өлүөр дылы көбүс-көнө уҥуохтаах, биирдэ “айа” диэбэккэ бу сиртэн бараахтаабыта. 70 сааһын ааһан да баран, от охсон куһуйара. Эбээ Оппуруоһа 87 сааһын туолан баран, Хаптаҕайга олорон 1993 сыл ыам ыйын 27 күнүгэр олохтон туораабыта.
Сэрии ыар кэмигэр күүстэрин-күдэхтэрин харыстаабакка үлэ үөһүгэр сылдьыбыт дьоммор тус бэйэм сүгүрүйэбин! Кыайыыны уһансыбыт дьоммунан, үтүө үлэһит дьоннордоохпунан, төрүттэрдээхпинэн киэн туттабын!
