Биһиги аҕабыт Павлов Иван Григорьевич 1938 сыллаахха олунньу 12 күнүгэр Үөгэн нэһилиэгэр  Сайыы үрэх үрдүгэр бэрт кэрэ айылҕалаах Чөкө алааһыгар Григорий Алексеевич   уонна  Анна Федоровна   Павловтар  дьиэ кэргэттэригэр 4 оҕонон күн сирин көрбүтэ. Кини бэрт кыра сааһыттан    оҕус  сиэтээччинэн  сарсыарда  5 чаастан киэһэ халлаан хараҥарыар диэри, холкуос  малатыыркатыгар бурдугу  ньыһыйыыга,  үлэлээн  бастакы үлэтин саҕалаабыт киһинэн буолар. Ол  да иһин буолуо,  аҕабыт  бэрт  эдэр сааһыттан  саҕалаан холкуос, сопхуос бары хара үлэтигэр илиитин араарбакка  үлэлээбит Үөгэн  бөһүөлэгин  биир ытык  кырдьаҕаһа буолар. Биһиги аҕабыт Иван Григорьевич   Павлов   60-с сылларга  ыччат сүөһүнү  төлөһүтүүгэ  үрдүк  кирбиилэри  ситиһэн, 1967сыллаахха  Бүтүн Союзтааҕы Норуот хаһаайыстыбатын  быыстапкатыгар барар путёвканан   наҕараадаламмыта. Бэйэтин  биир идэлээхтэрин кытта улахан  делегация састаабыгар киирэн    Москва, Ленинград   куораттарынан  баран кэлбитин үгүс хаартыскалара туоһулууллар.

Аҕабыт Иван Григорьевич кыһынын ыччат сүөһүну төлөһүтүүгэ онтон сайынын от үлэтигэр буһан – хатан, звено салайааччытынан өр кэмҥэ  утумнаахтык үлэлээн, коммунистическай  үлэ ударнига, 150 тонна   оттуур былаанын 200 тонна толорон, социалистическай куоталаһыы хас да  төгүллээх кыайыылааҕа буолан, 1973сыллаахха Советскай Союз профсоюзтарын Киин Сэбиэтин Бочуотунай грамотатынан наҕараадаламмыта.

Аҕабыт төрөөбүт – үөскээбит сирэ былыр – былыргыттан булдунан- аһынан, көмүс хатырыктааҕынан аатырбыт, эрэйдээх – суоллаах иистээх бүөм сир. Ол да иһин буолуо, аҕабыт булт абылаҥар ылларбыт, айылҕаҕа, сиргэ-уокка сылдьарын сүрдээҕин сөбүлүүр, бултуйан кэллэҕинэ сүргүтэ көтөҕүллэр ураты киһи.Сайын аайы оҕолорун- сиэннэрин мунньан ходуһатыгар оттуу барарыттан олус диэн үөрэр - көтөр.

Биһиги ийэлээх аҕабыт сүрдээх сэмэй, үлэһит, эйэҕэс, эйэлээх дьон буолан, уон оҕону (8 кыыс, 2 уол) төрөтөн, киһи – хара гына иитэн, үөрэттэрэн, улаатыннарбыттара.

Хомойуох иһин, күн күбэй ийэбит Анна Трофимовна олус эрдэ ыалдьан күн сириттэн күрэммитэ. Бу кэм устатыгар биһиги аҕабыт соҕотоҕун уон оҕону улаатыннаран көрөн – харайан, үөрэттэрэн, ыал оҥорон атахтарыгар туруорбута. Биһиги аҕабытыгар махталбыт муҥура суох, кини биһигини олох кыра эрдэхпититтэн кыыс, уол диэн араарбакка үлэҕэ сыһыаран үлэни таптыырга ииппитэ буолар.Онон биһиги билигин, кини ыччаттара ханнык да  үлэттэн чаҕыйан турбакка, олоххо эрэллээхтик хардыылаан баран иһэбит. Ол курдук оҕолоро, сиэннэрэ, хос сиэннэрэ өрөспүүбүлүкэ араас муннуктарыгар олорон үлэлии – хамсыы айа – тута сылдьаллар.

Уон оҕо амарах аҕата, 22 сиэн уонна 9 хос сиэн эһэлээтэр эһэтэ, ыччат сүөһүнү  төлөһүтүүгэ бастакы кылаастаах маастар, социалистическай куоталаһыы хас да төгүллээх кыайыылааҕа, «Коммунистическай үлэ ударнига», колхознай, совхознай үлэ бэтэрээнэ,   «Саха Өрөспүүбүлүкэтин тыатын хаһаайыстыбатын бэтэрээнэ»    «Сэрии оҕолоро» бочуоттаах бэлиэ, «Улуу Октябрьскай социалистическай революция 100 сыла» мэтээллэр  хаһаайына Иван Григорьевич Павлов.

Тапталлаах күндү киһибит аҕабыт, эһэбит, хос эһэбит 80 хаарыгар үктэнэн баран, уһун ыарахан ыарыы кэнниттэн  биһиги кэккэбититтэн 2018 c. бэс ыйын 13 күнүгэр туораабыта.

Биһиги эйигин куруук саныыбыт, ахтабыт ытыктыыбыт уонна киэн туттабыт.

                                                                                                                                          Кыыһа Фекла Еремеева - СР үөрэҕэриитин туйгуна,

                                                                                                                                          СР Президенин гранын хаһаайката.