Биһиги абаҕабыт Павлов Петр Федорович бэс  ыйын 10 күнүгэр 1915 сыллаахха Кыһыл  Бааһына Чөкө диэн алааһыгар төрөөбүтэ. Аҕата Павлов Федор Семенович, ийэтэ Павлова Агафия Анисимовна колхозтаахтар этэ. Кини биһиги аҕабыт Павлов Иван Григорьевич ийэтин Анна Федоровнаны кытта бииргэ төрөөбүттэр. Онон эбэбит Анна Федоровна, Петр Федорович улахан эдьиийэ буолар. Кини аннынан өссө үс уол төрөөбүттэр. Улахан уол Баһылай сэриигэ баран баран эргиллибэтэх. Икки кыра уолаттар Ыһыах Ыспыт диэн сиргэ ууга түһэн өлбүттэр.

Петр Федорович кыра оҕо сааһыттан ыарахан, хара үлэҕэ эриллэн улааппыта. Кини 4 кылаас үөрэммитэ. Оччотооҕу кэмнэргэ ас – таҥас кэмчи, сут – кураан дьыллар буоланнар үлэлиир  усулуобуйа олус мөлтөҕө.Сороҕор үлэтинэн ылар дохуоту наһаа кыраны биэрэллэрэ. Ону ол диэбэккэ биһиги абаҕабыт Аҕа дойду сэриитин кэмигэр  тыыл бары үлэтигэр  үтүө суобастаахтык, дьаныардаахтык үлэлээн кыайыыны уһансыыга бэйэтин кылаатын киллэрбит биир сүдү киһинэн буолар. Петр Федорович тыылга килбиэннээх үлэтин иһин «Кыайыы 40 сыла» юбилейнай мэтээлинэн , грамоталарынан наҕараадаламмыта уонна  «Үлэ ветерана» буолар урдук ааты ылбыта.   

Күндүтүк саныыр абаҕабыт Петр Федорович хара өлүөр диэри биһигини кытта бииргэ олорон, уон оҕону иитиһэн, киһи – хара оҥорбут биир саамай чугас киһибит буолар. Кини биһигини батыһыннара сылдьан оту оттуурга, дьиэ ис- тас үлэтигэр барытыгар үөрэтэрэ – такайара. Оскуолаҕа барарбытыгар сарсыарда аайы күөрчэх ытыйан сиэтэрэ. Үгүс остуоруйалаах, элбэх кэпсээннээх, кэрэхсэбиллээх таабырыннаах бэйэтигэр тардар ураты күүстээҕэ. Биһиги абаҕабыт Бүөтүр киһи быһыытынан биир тэҥ майгылаах, сүрдээх холку, мындыр, үтүө санаалаах киһи этэ. Үлэни өрө тутан ону ытыктыырга, онон дьоллонорго үөрэппитэ. Куруук холобурга сылдьар, киэн туттар биир күндү киһибит буолар.

                                                                                                                                                                                          Суруйда  балта Фекла Еремеева, Үөгэн нэһилиэгэ, Томпо  оройуона