“Үлэ ветерана”(1993с.), “Кыайыы 50 сыла” юбилейнай мэтээл (1995с.)

Биһиги аҕабыт Ньахалла Ньукулай олоҥхоһут этэ. Ийэбинээн иккиэн ыал хамначчыттара холбоспуттара. Ыылааҕынан, Ынах Хатыҥнааҕынан, Сылгы Хатыҥнааҕынан, Элэһининэн олорбуппут. Бииргэ төрөөбүттэр иккиэбит. Убайбынаан олус иллээх этибит. Иккиэн 99 тыһаҕаһы көрөрбүт. Убайым от тиэйэрэ, мас кэрдэрэ. Күһүн дөлүһүөн хомуйан хаһаас оҥосторбут. Кыра сааспыттан ахсааҥҥа үчүгэйдик үөрэммит буолан, фермаҕа суоччут этим.Убайым Ылдьаа  1997 сыллаахха өлбүтэ. Сэриини учууталым кэпсээнинэн билэбин. Оҕолор алтан иһити хомуйарбыт, дьон бэргэһэ, үтүлүк тигэллэрэ.   1949 сыллаахха бөһүөлэккэ көһөн киирбиппит уонна кэнсиэрдэргэ кыттыбытынан барбытым. Ыччаттары түмэ тардар этим. Балыыһаҕа 14 сыл устата завхоз, санитарка быһыытынан үлэлээбитим. Кырдьар сааспар Табалаахха аан маҥнайгы сейсмостанцияҕа үлэлээбитим. 1980 сылтан ый ахсын бириэмийэ харчы биэрэллэрэ. Сир хамсааһынын, чугастааҕы дэлби тэптэриини суруйар приборга хаартыскаҕа түһэрэн, таһааран Дьокуускайга ыытарым. Манна техник специальноһын баһылаабытым. Үп-харчы суох буолан, 1990 сыллаахха станция сабыллыбыта.Иллэҥ кэммэр хоһоон суруйабын, ону ырыа оҥостон ыллыыбын. Фестивалларга элбэхтик сырыттым. Ырыаны-тойугу Араҥас сулус оҥостон айа-ыллыы сылдьабын. “Табалааҕым барахсан” диэн тойук-ырыабын тойуксут Миитэрэй Слепцов туойбутун республика радиотун көмүс фондугар уура сытыаралларын санаатахпына олус үөрэбин. Миэхэ анаан оҕом, биир дойдулааҕым Степан Юмшанов: “Күөмэйиҥ өссө чөллөрүйдүн, ырыаҥ-тойугуҥ ыраахха диэри иһилиннин”,- диэн эппитэ миэхэ күүс-күдэх, суруйарбар-айарбар эрчими угар.Сайыҥҥы кырдьаҕастар ыһыахтарыгар куруук сылдьабын, дойдум дьонун кытта күөх сайыны үөрэ көрсөбүн, оһуохай үҥкүүтүгэр тэйэ көтөбүн, дьүөгэлэрбэр анаан ырыа ыллыыбын.Олох арааска үөрэттэ, ол курдук мотоцикл, мотор курдук уустук көлөлөрү талбыт өрөмүөннүүбүн, иискэ сатаабатым диэн суох. Өрөн, быысапкалаан оройуон быыстапкатыгар кыттарым.Үөрэ-көтө сырыттахха, олох чэпчэки буолар дии саныыбын.

Алтынньы 7 күнэ, 1998 сыл.